कर्नाटकमध्ये मुख्यमंत्रीबदलावरून मुख्यमंत्री सिद्धरामय्या आणि उपमुख्यमंत्री डी. के. शिवकुमार यांच्यात सुरू असलेल्या ‘शाब्दिक’ शक्ती प्रदर्शनाला तूर्तास पूर्णविराम लागला आहे. सिद्धरामय्या आणि शिवकुमार यांनी आज सकाळी एकत्र नाश्ता केला आणि त्यानंतर एकत्र पत्रकार परिषद घेतली. आमच्यात कोणतेही मतभेद नाहीत, भविष्यातही नसतील. आम्ही एकत्र काम करू, असे त्यांनी स्पष्ट केले.
शिवकुमार यांना अडीच वर्षांनी मुख्यमंत्री करण्याचे वचन दिल्याचा दावा त्यांचे समर्थक सातत्याने करीत आहेत. दोन दिवसांपूर्वी शिवकुमार यांनी एक पोस्ट केली होती. शब्द पाळण्यात फार मोठी शक्ती असते. दिलेला शब्द पाळला पाहिजे, असे त्यांनी त्यातून सूचक वक्तव्य केले होते. त्यानंतर लगेच सिद्धरामय्या यांनीही एक शाब्दिक पोस्ट केली. नागरिकांचे विश्व जोपर्यंत बदलत नाही, तोपर्यंत शब्दाला शक्ती प्राप्त होत नाही, असे सिद्धरामय्या यांनी त्यात म्हटले. त्यानंतर आज दोघांनी एकत्र पत्रकार परिषद घेऊन सारे काही आलबेल असल्याचे दाखविले. आम्ही हायकमांडचा आदेश मानतो. ते जे सांगतील, तोच आमचा निर्णय. आम्ही 2028मध्ये पुन्हा सरकार स्थापन करू, असे सिद्धरामय्या म्हणाले.
हायकमांडच्या आदेशावरून ‘ब्रेकफास्ट’
राज्यातील दोन्ही नेत्यांमध्ये सुरू असलेले शीतयुद्ध थांबविण्यासाठी हायकमांडने आदेश दिल्याचे सूत्रांनी सांगितले. शिवकुमार यांनीही म्हटले की, आमचा कोणताही गट नाही. आमचे 140 आमदार आहेत. हायकमांड जे म्हणेल, त्याचे आम्ही पालन करू.
