95व्या ऑस्कर (Oscars 2023) पुरस्कारांची आज घोषणा करण्यात आली. हिंदुस्थानच्या ‘द एलिफंट व्हिस्परर्स’ (The Elephant Whisperers) या लघु माहितीपटाला ऑस्कर पुरस्कार मिळाला आहे.
हिंदुस्थानला लघु माहितीपट विभागात (Best Documentary Short Film) नामांकन मिळाले होते. The Elephant Whispers या हिंदुस्थानी लघु माहितीपटाला नामांकन मिळाले होते. हॉलआउट, हाउ डू यू मीजर ए ईअर? द मार्था मिशेल इफेक्ट आणि स्ट्रेंजर एट द गेटने या गटामध्ये अंतिम यादीत स्थान मिळवले होते. मात्र या सर्व लघु माहितीपटांना मागे टाकत The Elephant Whisperers ने ऑस्कर पुरस्कारावर मोहोर उमटवली.
India’s ‘The Elephant Whisperers’ wins #Oscars award for the Best Documentary Short Film#Oscars2023 pic.twitter.com/SoXe7VnqVB
— ANI (@ANI) March 13, 2023
गुनीत मोंगा आणि अचिन जैन निर्मित ‘द एलिफंट व्हिस्पर्स’ हा 41 मिनीटांचा लघु माहितीपट आहे. यात मनुष्य आणि प्राणी यांच्यातील निस्वार्थी प्रेम दाखवण्यात आले आहे. एक दाम्पत्य रघु नावाच्या अनाथ हत्तीच्या देखभालीची जबाबदारी स्वीकारतात. रघुला वाचवण्यासाठी हे दाम्पत्य किती कष्ट घेते हे या चित्रपटातून दाखवण्यात आले आहे. कार्तिकी गोन्सालवीस हिने या चित्रपटाचे दिग्दर्शन केले आहे. हा चित्रपट 8 डिसेंबर 2022 रोजी ओटीटी प्लॅटफॉर्म नेटफ्लिक्सवर प्रदर्शित झाला होता.
RRR कडे लक्ष
जगभरातल्या नामांकित कलाकृती ऑस्कर पुरस्कार सोहळ्यात नॉमिनेशन लिस्टमध्ये आहेत. या हिंदुस्थानचा RRR या चित्रपटाचाही समावेश आहे. RRR ला मधील ‘नाटू नाटू’ गाण्याला बेस्ट ओरिजनल साँग कॅटेगरीमध्ये नॉमिनेशन मिळाले आहे. RRR ऑस्कर सोहळ्यात बाजी मारून हिंदुस्थानची मान उंचावणार का याकडे सर्वांचे लक्ष आहे.
दीपिकाने जिंकली मनं
बॉलिवूड अभिनेत्री दीपिका पदुकोण हिने ऑस्कर पुरस्कार सोहळ्याच्या मंचावर प्रेझेन्टर म्हणून जबाबदारी निभावली. दीपिकाने काळ्या रंगाचा मनमोहक गाऊन घातला होता. मंचावर तिचे आगमन होताच उपस्थितांनी टाळ्यांचा कडकडाट केला. दीपिकाने हिंदुस्थानच्या RRR या चित्रपटाबद्दल उपस्थितांना माहिती दिली.
