भविष्य निर्वाह निधीतील पैसे काढण्यासाठी मंजूर बिलाचा प्रस्ताव ट्रेझरीकडे पाठवण्यासाठी दोन हजार रुपयांची लाच घेताना जिल्हा परिषदेतील दोघांना रंगेहाथ पकडले. जिल्हा परिषदेच्या भविष्य निर्वाह निधी विभागात ही कारवाई करण्यात आली.
लेखा शाखेचे वरिष्ठ सहायक पूजन विलास भंडारे (वय 31, रा. कासेगाव, ता. वाळवा) आणि कनिष्ठ सहायक निखिल राजू कांबळे (वय 35, रा. नांदणी रोड, जयसिंगपूर) अशी अटक करण्यात आलेल्यांची नावे आहेत.
लाचलुचपत प्रतिबंधक विभागाकडून मिळालेल्या माहितीनुसार, तक्रारदार व्यक्तीने भविष्य निर्वाह निधीमधून पाच लाख रुपये काढण्यासाठी अर्ज केला होता. त्याच्या मंजूर प्रस्तावाचे बिल ट्रेझरी ऑफिसला पाठवण्यासाठी सांगली जिल्हा परिषदेच्या भविष्य निर्वाह निधी विभागातील लेखा शाखेचे वरिष्ठ सहायक पूजन भंडारे याने अडीच हजारांच्या लाचेची मागणी केली होती.
याबाबत संबंधित व्यक्तीने सांगलीच्या लाचलुचपत प्रतिबंधक विभागाकडे तक्रार केली. याची दखल घेऊन लाचलुचपत प्रतिबंधक विभागाने त्वरित पडताळणी केली असता, पूजन भंडारे याने तडजोडीनंतर दोन हजार रुपये घेण्याचे मान्य केले, तर त्याला लाच देण्यासाठी दुसरा संशयित निखिल कांबळे याने प्रोत्साहन दिल्याचे समोर आले. या पडताळणीनंतर लाचलुचपत प्रतिबंध विभागाने तत्काळ कारवाई करत पैसे घेताना दोघांनाही पकडले. त्यांच्याविरुद्ध विश्रामबाग पोलीस ठाण्यात गुन्हा दाखल करण्यात आला आहे.
लाचलुचपत प्रतिबंधक विभागाच्या पोलीस उपअधीक्षक यास्मिन इनामदार, निरीक्षक किशोरकुमार खाडे, अंमलदार प्रीतम चौगुले, अजित पाटील, उमेश जाधव, चंद्रकांत जाधव, पोपट पाटील, ऋषिकेश बडणीकर, धनंजय खाडे, सुदर्शन पाटील, सलीम मकानदार, रामहरी वाघमोडे, अतुल मोरे, सीमा माने आणि विना जाधव यांच्या पथकाने ही कारवाई केली.
