हॉटेलमध्ये बिलासोबत दिली जाणारी टिप ही वेटरसाठी महत्त्वाची असते. कारण, टिप देऊन ग्राहक एकप्रकारे त्याच्या मेहनतीची पावतीच त्याला देत असतात. पण, कुणाला एक लाख 40 हजार रुपयांची टिप मिळाली तर??
हो. असं खरोखर घडलं आहे. हॉलिवूड गायक आणि अभिनेता डॉनी वॉलबर्गने नवीन वर्षाच्या सुरुवातीला एका हॉटेलमध्ये जेवण झाल्यानंतर तेथील वेट्रेसला 2020 डॉलर इतकी टिप दिली. ही रक्कम म्हणजे हिंदुस्थानी चलनानुसार जवळपास 1 लाख 40 हजार रुपये होतात. डॉनीची पत्नी जेनी हिने सोशल मीडियावर हा फोटो शेअर करत या टिपची माहिती शेअर केली. इतकी मोठी रक्कम टिप म्हणून मिळाल्यानंतर या हॉटेलमध्ये वेट्रेसचे काम करणारी डॅनिअल फ्रांजोनी भलतीच खुश आहे.
. @DonnieWahlberg starting 2020 off like the amazing man he is. #ihop #2020tipchallenge
pic.twitter.com/AjAEN0hqL6— Jenny McC-Wahlberg (@JennyMcCarthy) January 1, 2020
जेनी आणि डॉनी नवीन वर्षाचे स्वागत करत सेंट चार्ल्स येथील IHOP हॉटेलमध्ये जेवणासाठी गेले होते. जेवणाचे बिल 78 डॉलर (5600 रुपये) इतके झाले होते आणि त्यांनी तेथील वेट्रेसला 1 लाख 40 हजारांची टिप दिली आहे. टिप आणि बिलाची रक्कम चुकती करताना त्यांनी नवीन वर्षांच्या लेखी शुभेच्छाही बिलावर दिल्या. ही टिप सोशल मीडियावर ट्रेंड होत असलेल्या 2020 टिप चॅलेंजचा भाग असल्याचे म्हटले जात आहे. या चॅलेंजमध्ये जेवण वाढणाऱ्या व्यक्तीला नवीन वर्षाच्या आकड्याची टिप देण्यात येते. 2018 मध्येही हा ट्रेंड चांगलाच रुजला होता.
