जेएनपीटी ते गेट वे ऑफ इंडिया या प्रवासी बोटीतील इंजिनाच्या डक्टमध्य पडून हवाई दलातील जवानाच्या 10 वर्षीय मुलाचा दुर्दैवी अंत झाल्याची घटना घडली आहे. करणदीप सिंग असे या मुलाचे नाव आहे. न्हावा- शेवा पोलिसांनी या घटनेला जबाबदार असलेल्या प्रवासी बोटीचे मालक आणि त्यावरील कर्मचाऱ्यांवर निष्काळजीपणाचा गुन्हा दाखल केल्याची माहिती वरिष्ठ पोलिस निरीक्षक प्रमोद जाधव यांनी दिली.
जेएनपीटी ते गेटवे प्रवासी बोटीमध्ये ही घटना घडली. तक्रारदार हरविंदर लखपत सिंग हे हवाई दलाच्या जेएनपीटी-न्हावाशेवा तळावर सार्जंट म्हणून कार्यरत असून ते जेएनपीटी टाऊनशिपमध्ये राहतात. 25 जानेवारी रोजी पाठदुखीचा त्रास होऊ लागल्याने ते उपचारासाठी जेएनपीटी ते गेट-वे प्रवासी बोटीने कुलाबा येथील आयएनएचएस अश्विनी रुग्णालयात पत्नी व दोन मुलांसह जात होते. सकाळी सव्वा दहा वाजता बोट गेट-वेच्या दिशेने निघाल्यानंतर दोन किमीच्या अंतरावर त्यांचा 10 वर्षांचा मुलगा करणदीप सिंग हा बोटीवरील स्नॅक्स सेंटरमध्ये चिप्स घेण्यासाठी गेला. मात्र तो इंजिनच्या डक्टमध्ये पडल्याने त्याच्या मोठ्याने ओरडण्याचा आवाज आला. इंजिन बंद करेपर्यंत करणदीप हा इंजिनच्या शाफ्टमध्ये तीन ते चार वेळा फिरला जाऊन गंभीर जखमी झाला. त्याला तत्काळ स्पीडबोटीने आयएनएचएस अश्विनी रुग्णालयात नेण्यात आले. मात्र 26 जानेवारी रोजी पहाटे त्याचा मृत्यू झाला. हरविंदर सिंग यांनी रविवारी न्हावा-शेवा पोलिस ठाण्यात तक्रार दाखल केली. न्हावा शेवा पोलिस याबाबत अधिक तपास करत आहेत.
