नगर जिल्ह्यातील पारनेर तालुक्यातील भाळवणी येथील जिल्हा परिषदेच्या शाळेची भिंत अचानक कोसळली. या घटनेमुळे जिल्ह्यातील धोकादायक शाळांचा मुद्दा पुन्हा चर्चेत आला आहे. शिक्षण विभागाने नुकत्याच केलेल्या सर्व्हेत जिल्ह्यात तब्बल 2 हजार 729 शाळा खोल्या धोकादायक असल्याचे समोर आले आहे. या शाळा खोल्या पाडण्यास मंजुरीही देण्यात आली गेली आहे. मात्र, यावर करण्यात आलेल्या कार्यवाहीबाबत प्रशासनच अनभिज्ञ आहे.
जिल्ह्यात अनेक शाळा मोडकळीस आल्या आहेत. या शाळा खोल्या पाडून त्या ठिकाणी नवीन शाळा खोल्या बांधकाम करणे गरजेचे आहे. त्यानुसार शिक्षण विभागाने केलेल्या सर्व्हेत जिल्ह्यात जवळपास 2 हजार 729 शाळा खोल्या धोकादायक असल्याचे स्पष्ट झाले. या शाळा खोल्या पाडण्यासाठी तातडीने प्रस्ताव तयार करण्यात आले. 1 हजार 590 शाळा खोल्या पाडण्यासाठी जिल्हा परिषदेने मंजुरी दिली आहे. त्यातील किती शाळा खोल्या आतापर्यंत पाडण्यात आल्या याबाबत मात्र प्रशासनाकडे माहिती नाही. या शाळा खोल्या पाडून त्या ठिकाणी नवीन शाळा खोल्यांचे बांधकाम करावे लागणार आहे. यासाठी आधी या शाळा खोल्या पाडणे महत्त्वाचे आहे. ज्या ठिकाणी शाळा खोल्या धोकादायक आहेत, त्या शाळा खोल्या तत्काळ पाडण्याचे आदेश प्रशासनाने दिले आहेत. तसेच शिर्डी संस्थान व जिल्हा नियोजन समितीच्या माध्यमातून बांधकामासाठी निधी देण्यात येत आहे. शिर्डी संस्थानच्या निधीतून 126 तर पुनर्विनियोजनाच्या निधीतून 105 शाळा खोल्या बांधण्यात येणार आहेत. असे असले तरी जिल्ह्यातील धोकादायक शाळा खोल्यांची संख्या पाहता यासाठी आणखी निधी आवश्यक आहे. जिल्हा परिषद प्रशासनामार्फत यासाठी पाठपुरावा करण्यात येत आहे.
