प्रसारमाध्यमांपुढे बेताल बडबड करणारे भाजपचे मंत्री नितेश राणे चांगलेच अडचणीत सापडले आहेत. शिवसेना नेते, खासदार संजय राऊत यांच्याबाबत बदनामीकारक वक्तव्य केल्याप्रकरणी माझगाव दंडाधिकारी न्यायालयात दाखल करण्यात आलेल्या खटल्याला कायमस्वरूपी गैरहजर राहण्याची मुभा द्यावी, अशी विनंती नितेश राणे यांच्या वकिलांनी आज दंडाधिकाऱ्यांना केली; मात्र ही विनंती दंडाधिकाऱ्यांनी फेटाळून लावत प्रत्येक सुनावणीला गैरहजर राहता येणार नाही असे राणेंना बजावले
महाराष्ट्रात लवकरच राजकीय भूकंप होणार… खासदार संजय राऊत हे राष्ट्रवादी काँग्रेसमध्ये प्रवेश करणार, असे निराधार दावे करीत मत्स्यव्यवसाय व बंदरे विकास राज्य मंत्री नितेश राणे बरळले होते. एका वृत्तवाहिनीशी बोलताना खासदार संजय राऊत यांच्याबाबत बदनामीकारक विधाने केल्याप्रकरणी खासदार राऊत यांनी नितेश राणे यांच्याविरुद्ध माझगाव दंडाधिकारी कोर्टात अब्रुनुकसानीचा खटला दाखल केला आहे. त्यावर महानगर दंडाधिकारी आरती कुलकर्णी यांच्यापुढे आज सोमवारी सुनावणी झाली. गेल्या सुनावणीवेळी नितेश राणे यांना तातडीने समन्स बजावून न्यायालयात व्यक्तिशः हजर राहण्याचे आदेश दिले होते. मात्र सुनावणीला गैरहजर राहिल्याने न्यायालयाने त्यांना जामीनपात्र वॉरंट बजावले होते. तेव्हा सिंधुदुर्ग पोलीस ठाण्यातून त्यांनी 2 हजार रुपयांच्या जातमुचलक्यावर जामीन घेतला आहे. तसेच नितेश राणे हे मंत्री असल्याने त्यांना कायमस्वरूपी सुनावणीला उपस्थित राहता येणार नाही अशी बाजू राणे यांच्या वकिलांनी मांडली होती.
