हिंदुस्थान आणि इंग्लंड संघात पाच कसोटी सामन्यांच्या मालिकेला शुक्रवारपासून सुरुवात झाली. दोन्ही उभय संघात हेडिंग्लेच्या लीड्स येथे पहिला सामना खेळला जात आहे. या लढतीत इंग्लंडचा कर्णधार बेन स्टोक्स याने नाणेफेक जिंकून हिंदुस्थानला प्रथम फलंदाजीला आमंत्रित केले. या लढतीत इंडियन प्रीमियर लीगमध्ये धावांचा पाऊस पाडणाऱ्या साई सुदर्शन याला पदार्पणाची संधी मिळाली आहे. हिंदुस्थानचा दिग्गज खेळाडू चेतेश्वर पुजारा याने त्याला टीम इंडियाची कॅप सोपवली.
साई सुदर्शन हिंदुस्थानकडून कसोटी क्रिकेट खेळणारा 317 वा खेळाडू आहे. 23 वर्षीय साई सुदर्शन सध्या जबरदस्त फॉर्मात आहे. प्रथम श्रेणी क्रिकेटमध्ये धावांचा पाऊस पाडल्यानंतर त्याने टी20 क्रिकेटमध्येही आपली छाप पाडली. नुकत्याच झालेल्या आयपीएल 2025 मध्ये साई सुदर्शनने गुजरात टायटन्स संघाकडून खेळताना 700 हून अधिक धावा चोपत ऑरेंज कॅप जिंकली होती.
1st Test. IND XI : Y. Jaiswal, KL. Rahul, S. Sudharsan, S. Gill (c), R. Pant (wk), K. Nair, R. Jadeja, S.Thakur, P.Krishna, J. Bumrah, M. Siraj. https://t.co/ExbRAWMM3Z #ENGvIND #1stTest
— BCCI (@BCCI) June 20, 2025
कोहली, द्रविड, गांगुलीच्या क्लबमध्ये एन्ट्री!
दरम्यान, साई सुदर्शन याने विराट कोहली, राहुल द्रविड आणि सौरव गांगुली या दिग्गज फलंदाजांच्या खास क्लबमध्ये एन्ट्री केली आहे. या तिघांनीही 20 जून रोजीच कसोटी क्रिकेटमध्ये पदार्पण केले होते. विराट कोहली याने वेस्ट इंडिजविरुद्ध किंग्स्टन येथे पहिला सामना खेळला होता. तर राहुल द्रविड आणि सौरव गांगुलीने इंग्लंडविरुद्ध लॉर्ड्समध्ये 20 जूनला आपला पदार्पणाचा कसोटी सामना खेळला होता.
साई सुदर्शन तिसऱ्या क्रमांकावर खेळणार
दरम्यान, नाणेफेक झाल्यानंतर कर्णधार शुभमन गिल म्हणाला की, ‘आम्हीही प्रथम गोलंदाजी घेतली असती. पण आमची तयारी जोरात आहे. ऊन पडले असून फलंदाजीसाठी चांगले वातावरण आहे. आम्ही बेकेनहॅममध्ये सराव सामना खेळला होता, त्यामुळे खेळाडूही तयारीत आहेत. साई सुदर्शन पदार्पण करत असून करुण नायरचेही संघात पुनरागमन झाले आहे. साई सुदर्शन तिसऱ्या क्रमांकावर फलंदाजीला येईल.’
पहिल्या कसोटीसाठी हिंदुस्थानचा संघ
यशस्वी जैस्वाल, केएल राहुल, साई सुदर्शन, शुभमन गिल (कर्णधार), ऋषभ पंत, करुण नायर, रवींद्र जडेजा, शार्दुल ठाकूर, जसप्रीत बुमराह, मोहम्मद सिराज आणि प्रसिध कृष्णा
इंग्लंडचा संघ –
जॅक क्राऊली, बेन डकेट, ओली पोप, जो रूट, हॅरी ब्रूक, बेन स्टोक्स (कर्णधार), जॅमी स्मिथ, क्रिस वोक्स, ब्रायडन कार्स, जॉश टंग आणि शोएब बशीर.
