हिंदुस्थानच्या कसोटी मालिकेतील पराभवानंतर मुख्य प्रशिक्षक गौतम गंभीर यांच्यावर चौफेर टीकेची झोड उठली आहे. मात्र अशा परिस्थितीत महान माजी फलंदाज आणि ज्येष्ठ समालोचक सुनील गावसकर यांनी गंभीरची खंबीरपणे पाठराखण केली आहे.
‘हिंदुस्थानी संघाने चॅम्पियन्स ट्रॉफी आणि आशिया चषक जिंकले तेव्हा तुम्ही कुठे होता?’ असा थेट सवाल गावसकर यांनी टीकाकारांना केला. प्रशिक्षक हा केवळ संघ बांधतो, प्रत्यक्ष खेळ मात्र खेळाडूंनाच करावा लागतो, असे स्पष्ट करत त्यांनी गंभीरवर खापर फोडण्याच्या प्रवृत्तीवर कठोर शब्दांत टीका केली.
गेल्या 12 वर्षांत घरच्या मैदानावर कसोटी मालिका न गमावणाऱया टीम इंडियाने गेल्या एका वर्षात दोन पराभव पत्करले. त्यामुळे गंभीर लक्ष्यस्थानी आले. मात्र गावसकर म्हणाले, ‘संघ जिंकतो तेव्हा प्रशिक्षकाचा उल्लेख नसतो आणि हरतो तेव्हा सगळा दोष त्याच्यावर? हे दुहेरी निकष आहेत.’
जेव्हा संघ यशस्वी झाला तेव्हा तुम्ही गंभीरला मर्यादित षटकांचा कायमस्वरूपी प्रशिक्षक बनवण्याची मागणी करत होतात. आज अपयश आले की हकालपट्टीची भाषा करता, असा सवाल उपस्थित करत गावसकर यांनी प्रशिक्षक व्यवस्थेच्या बदनामीविरोधात कडाडून आवाज उठवला.
