मुख्यमंत्री देवेंद्र फडणवीस यांच्यासोबत वावरणारे नेते गद्दार आहेत, ते जैन समाजात फूट पाडण्याचा प्रयत्न करत आहेत, प्राण गेले तरी त्या गद्दारांना सोडणार नाही, असा इशारा कबुतरखान्यांच्या मुद्दय़ावर झालेल्या आंदोलनात पुढाकार घेतलेले जैन मुनी नीलेश चंद्र यांनी आज दिला. फडणवीस यांना हटवून योगी आदित्यनाथ यांना मुख्यमंत्री बनवल्यास महाराष्ट्राची सफाई होईल, अशी मागणीही त्यांनी केली.
नीलेश चंद्र यांनी एका मराठी वृत्तवाहिनीला मुलाखत दिली. त्यात त्यांनी कबुतरखान्याचा वाद आणि संबंधित प्रश्नांवर उत्तरे दिली. जैन धर्म प्राचीन आणि शांतताप्रिय असून सनातनी हिंदू समाजाचाच एक भाग आहे असे सांगतानाच, निवडणुका जवळ आल्यानंतरच मराठी-जैन मारवाडी असा वाद निर्माण केला जातो, असा आरोप त्यांनी केला.
