शिवसेना पक्ष आणि ‘धनुष्यबाण’ निवडणूक चिन्हाबाबत सर्वोच्च न्यायालयात येत्या बुधवारपासून अंतिम सुनावणी सुरू होणार आहे. सरन्यायाधीश सूर्य कांत यांच्या नेतृत्वाखालील खंडपीठ सलग दोन दिवस अंतिम युक्तिवाद ऐकून घेणार आहे. न्यायालयाने नोव्हेंबरच्या सुनावणीवेळी तसे स्पष्ट केले होते. शिवसेना पक्ष आणि धनुष्यबाण कोणाचा याचा निकाल न्यायालय लवकरच जाहीर करण्याची चिन्हे आहेत.
शिवसेनेशी गद्दारी केलेल्या शिंदे गटाला पक्षाचे नाव आणि ‘धनुष्यबाण’ निवडणूक चिन्ह देण्याच्या केंद्रीय निवडणूक आयोगाच्या 2022 मधील निर्णयाला सर्वोच्च न्यायालयात आव्हान देण्यात आले आहे. शिवसेना पक्षप्रमुख उद्धव ठाकरे यांनी यासंदर्भात याचिका दाखल केली आहे. तसेच शिंदे गटाच्या आमदारांना अपात्र ठरवण्याऐवजी पात्र ठरवणाऱया विधानसभा अध्यक्ष राहुल नार्वेकर यांच्या निर्णयाला शिवसेनेचे मुख्य प्रतोद, आमदार सुनील प्रभू यांनी आव्हान दिले आहे. दोन्ही याचिकांवर एकाचवेळी सुनावणी घेण्यास सर्वोच्च न्यायालय तयार झाले आहे. त्यानुसार 21 जानेवारीला सुनावणी निश्चित केली आहे. याप्रकरणी नोव्हेंबरमध्ये मागील सुनावणी झाली होती. त्यावेळी न्यायालयाने 21 व 22 जानेवारीला सलग दोन दिवस अंतिम युक्तिवाद ऐकून घेऊ, याव्यतिरिक्त दुसरे प्रकरण सूचिबद्ध केले जाणार नाही, असे स्पष्ट केले होते. न्यायालयाने कोर्ट मास्टरना दोन्ही दिवशी इतर प्रकरण कार्यतालिकेत सूचिबद्ध न करण्याचे निर्देश दिले होते. महाराष्ट्रातील महापालिका, नगर परिषद, नगर पंचायत निवडणुका नुकत्याच संपल्या आहेत. आता जिल्हा परिषद निवडणुकांची प्रक्रिया सुरू झाली आहे. याचदरम्यान शिवसेना पक्ष आणि ‘धनुष्यबाण’ चिन्हाच्या अंतिम सुनावणीला वेग मिळणार आहे. त्यामुळे या सुनावणीकडे अवघ्या महाराष्ट्राचे लक्ष लागले आहे.
‘राष्ट्रवादी’चीही सुनावणी
सर्वोच्च न्यायालय शिवसेनेबरोबर राष्ट्रवादी काँग्रेसच्या पक्ष आणि ‘घडय़ाळ’ चिन्हाची सुनावणी एकाचवेळी घेणार आहे. राष्ट्रवादी पक्ष आणि घडय़ाळ चिन्हासंदर्भात पक्षाध्यक्ष शरद पवार यांनी याचिका केली आहे, तर अजित पवार गटाच्या आमदारांना अपात्र ठरवण्याऐवजी पात्र ठरवण्याच्या विधानसभा अध्यक्षांच्या निर्णयाला जयंत पाटील यांनी आव्हान दिले आहे. शिवसेनेचे युक्तिवाद ऐकल्यानंतर न्यायालय राष्ट्रवादीची सुनावणी घेणार आहे.
