ब्रेडपासून बनवलेले कुरकुरीत आणि चविष्ट स्नॅक्स लहान मुलांपासून मोठ्यांपर्यंत सर्वांनाच खूप आवडतात. अतिशय कमी वेळात तयार होत असल्यामुळे सकाळच्या घाईच्या नाश्त्यासाठी किंवा संध्याकाळच्या लहान भुकेसाठी हे स्नॅक्स एक उत्तम पर्याय ठरतात. आरोग्याचा विचार करता पांढऱ्या ब्रेडऐवजी ‘होल व्हीट’ किंवा ‘मल्टीग्रेन’ ब्रेड निवडणे अधिक फायदेशीर मानले जाते.
ब्रेडपासून बनवा हे 5 क्रिस्पी स्नॅक्स:
वेज ब्रेड टोस्ट :
ब्रेडवर बारीक चिरलेली सिमला मिरची, टोमॅटो, कांदा आणि गाजर ठेवा. वरून थोडे किसलेले पनीर घालून तव्यावर मंद आचेवर ब्रेड कुरकुरीत होईपर्यंत शेका. भाज्यांमुळे शरीराला फायबर आणि व्हिटॅमिन्स मिळतात, तर पनीरमुळे प्रोटीन आणि कॅल्शियम मिळते.
ब्रेड पिझ्झा :
ब्रेडवर टोमॅटो सॉस लावा. त्यावर कांदा, सिमला मिरची, टोमॅटो आणि थोडे चीझ टाका. तव्यावर किंवा ओव्हनमध्ये ब्रेड कुरकुरीत होईपर्यंत आणि चीझ वितळेपर्यंत शेकून घ्या. मुलांसाठी हा एक झटपट आणि आवडता पर्याय आहे.
पनीर ब्रेड रोल :
ब्रेडच्या कडा कापून तो लाटण्याने थोडा लाटून घ्या. त्यात पनीर, गाजर, सिमला मिरची आणि कांद्याचे सारण भरा. रोल तयार करून तव्यावर हलक्या तेलात शेका. यामुळे पोट दीर्घकाळ भरलेले राहण्यास मदत होते.
वेज ब्रेड कटलेट :
ब्रेडचे लहान तुकडे करून ते उकडलेला बटाटा, गाजर, मटार आणि मसाल्यांसोबत एकत्र मळून घ्या. त्याचे लहान कटलेट बनवून तव्यावर कमी तेलात दोन्ही बाजूंनी क्रिस्पी होईपर्यंत शेका.
एग ब्रेड टोस्ट :
एका अंड्यामध्ये कांदा, टोमॅटो, कोथिंबीर आणि हलके मसाले घालून ते फेटून घ्या. यात ब्रेड हलका बुडवून तव्यावर दोन्ही बाजूंनी शेका. अंड्यातून मुबलक प्रमाणात प्रोटीन आणि व्हिटॅमिन्स मिळतात.
ब्रेड स्नॅक्स बनवताना ‘या’ गोष्टींची काळजी घ्या
- नेहमी होल व्हीट किंवा मल्टीग्रेन ब्रेड वापरा, ज्यामध्ये फायबरचे प्रमाण जास्त असते.
- स्नॅक्स बनवताना अतिप्रमाणात तेल, बटर किंवा चीझ वापरणे टाळा.
- भाज्या चांगल्या धुवूनच वापरा.
- ब्रेड जास्त वेळ करपू देऊ नका.
