
पाऊस लांबल्याने जिल्ह्यात दिवसेंदिवस टँकरची संख्या वाढत आहे. सध्या जिल्ह्यातील 49 गावे व 262 वाडय़ा-वस्त्यांवरील 87 हजार 46 लोकांना टँकरने पाणीपुरवठा केला जात आहे. सध्या जिल्ह्यात टँकरची संख्या 45 इतकी झाली आहे.
नगर जिल्ह्यातील काही भागात मोठय़ा प्रमाणावर पाऊस पडत आहे. परंतु अद्यापि जिल्ह्याच्या मोठय़ा भागात पावसाचे आगमन झाले नाही. पाऊस वेळेत न पडल्यास या महिन्यात टँकरच्या संख्येत आणखी वाढ होऊ शकते. दरम्यान, गेल्या 20 दिवसांत टँकरची संख्या 16 वरून 45 झाली आहे. मागीलवर्षी चांगला पाऊस पडल्यामुळे यंदा उन्हाळ्यात टंचाईजन्य स्थिती जाणवली नाही. परिणामी पाण्याच्या टँकरची संख्याही मर्यादित राहिली. जूनमध्ये पाऊस पडल्यास पाण्याची कमतरता भासत नाही. परंतु यंदा पूर्ण जून महिना संपला तरी अद्यापपर्यंत समाधानकारक पाऊस पडलेला नाही. त्यामुळे जिल्ह्यातील 87 हजार लोकसंख्येला टँकरने पाणीपुरवठा करावा लागत आहे.
यंदाच्या उन्हाळ्यात एप्रिलपर्यंत एकही टँकर जिल्ह्यात सुरू नव्हता. थेट 18 एप्रिलला संगमनेर व अकोले तालुक्यांत प्रत्येकी एक टँकर सुरू झाला. त्यानंतर मे व आता जूनमध्ये टँकरची संख्या वाढली. 12 जूनपर्यंत टँकरची संख्या 16 होती. ती आता 45 झाली आहे. जिल्ह्यात सध्या 49 गावे व 262 वाडय़ा-वस्त्यांवरील 87 हजार 46 ग्रामस्थांची तहान टँकरच्या पाण्याने भागत आहे. एकूण 45 पैकी 11 ठिकाणी शासकीय टँकरने, तर 34 ठिकाणी खासगी टँकरने पाणीपुरवठा केला जात आहे. यात अद्यापपर्यंत जिल्ह्यातील 5 तालुक्यांतच टँकर सुरू आहेत.
सर्वांत जास्त टँकर पारनेरमध्ये
नगर जिल्ह्यात सुरू असलेल्या 45 टँकरपैकी सर्वांत जास्त 14 पारनेर तालुक्यात सुरू आहेत. त्यानंतर 10 टँकर संगमनेर तालुक्यात, 10 टँकर पाथर्डी तालुक्यात, 9 टँकर नगर तालुक्यात, तर 2 टँकर अकोले तालुक्यात सुरू आहेत.


























































