गोरेगाव पूर्व येथील महानंद डेअरीच्या शीतगृहात बुधवारी रात्री नऊच्या सुमारास वायुगळती सुरू झाली. अग्निशमन दल व अन्य यंत्रणांनी युद्धपातळीवर बचावकार्य करून परिस्थिती नियंत्रणात आणली. सुदैवाने या दुर्घटनेत कोणीही जखमी झाले नाही. गोरेगाव येथील महानंद डेअरीमधील दुधावर प्रक्रिया करून विविध उत्पादने तयार केली जातात. या डेअरीतील शीतगृहात बुधवारी रात्री अमोनिया वायूच्या एका सिलिंडरमधून अचानक गळती सुरू झाली. दुर्घटनेची माहिती मिळताच अग्निशमन दलाचे जवान, संबंधित पालिका विभाग कार्यालयातील कर्मचारी तसेच रासायनिक गळती हाताळणाऱ्या कर्मचाऱ्यांचे पथक घटनास्थळी दाखल झाले. डेअरीच्या सर्व कामगारांना सुरक्षितरीत्या बाहेर काढल्यामुळे मोठी जीवितहानी टळली. बुधवारी रात्री अकराच्या सुमारास परिस्थिती नियंत्रण आली.
