जिल्हय़ाचे लक्ष लागून राहिलेल्या अनगर नगरपंचायत निवडणुकीतील नगराध्यक्षपदाच्या अजित पवार गटाच्या उमेदवार उज्ज्वला थिटे यांचा अपिल अर्ज आज न्यायालयाने फेटाळला. यामुळे भाजपच्या उमेदवार माजी आमदार राजन पाटील यांच्या सूनबाई प्राजक्ता पाटील यांची बिनविरोध निवड निश्चित झाली आहे.
अनगर नगरपंचायत निवडणुकीसाठी अजित पवार गटाच्या उमेदवार उज्ज्वला थिटे यांनी पोलीस बंदोबस्तात भाजपच्या उमेदवार प्राजक्ता पाटील यांच्याविरोधात नगराध्यक्षपदासाठी अर्ज दाखल केला होता. त्यांच्या अर्जावर सही नसल्याचे कारण देत निवडणूक अधिकाऱ्यांनी अर्ज नामंजूर केला होता. त्यामुळे थिटे यांनी जिल्हा सत्र न्यायालयात अपिल दाखल केले होते. त्यावर झालेल्या सुनावणीत जिल्हा न्यायाधीश प्रशांत राजवैद्य यांनी थिटे यांचा अर्ज फेटाळत निवडणूक निर्णय अधिकाऱ्यांचा निर्णय कायम ठेवला. त्यामुळे या निवडणुकीत राष्ट्रवादीचे आव्हान संपुष्टात आले आहे.
