जगभरात घडणाऱया अनेक लहान मोठय़ा गोष्टींची सोशल मीडियावर कायम चर्चा होत असते. अनेक अनोख्या गोष्टी, स्थानिक प्रदेश, प्रार्थनास्थळे, इतिहासात दडलेली रहस्ये अशा चर्चांमधून समोर येत असतात. काही घटनांवर त्या त्या विषयातले तज्ञदेखील आपले मत व्यक्त करत असतात. सध्या हिंदुस्थानात घडलेली अशी एक घटना सोशल मीडियावर प्रचंड चर्चेत आलेली आहे. काही दिवसांपूर्वी तामीळनाडूमधील मच्छीमारांच्या जाळ्यात ‘ओअरफिश’ हा दुर्लभ जातीचा मासा अडकला. जपान आणि फिलिपिन्ससारख्या देशात या माशाला ‘डूम्स डे फिश’ अथवा ‘संकटाचा दूत’ म्हणून ओळखले जाते. हा मासा आता हिंदुस्थानच्या किनाऱयावर सापडल्याने शंका-कुशंकांना उधाण आले आहे.
चांदीसारखा रंग असलेला आणि एखाद्या रिबिनसारखा दिसणारा हा मासा 30 फूट एवढा लांब वाढू शकतो. या माशाविषयी काही देशांमध्ये एक प्रकारचे भीतीचे वातावरण आहे. समुद्रात खोल अशा पाण्यात राहणारा मासा जेव्हा पृष्ठभागावर येतो तेव्हा ते येणाऱया भूपंप अथवा त्सुनामीसारख्या नैसर्गिक आपत्तींचे लक्षण असते, असे जपान आणि फिलिपिन्समध्ये मोठय़ा प्रमाणावर मानले जाते. त्याचमुळे त्याला ‘डूम्स डे फिश’ म्हणून ओळखले जाते. योगायोगाने 2011 मध्ये जपानमध्ये आलेल्या प्रचंड अशा भूपंप आणि त्सुनामीपूर्वी तिथे डझनभर ओअरफिश दिसले होते. मेक्सिकोमध्ये देखील ओअरफिश दिसले आणि भूपंप घडला. तर 2017 मध्ये फिलिपिन्समध्ये आलेल्या भूपंपापूर्वी देखील दोन ओअरफिश दिसले होते. या घटनांमुळे डूम्स डे फिशच्या कथेला आणखी बळकटी मिळाली.
संशोधक मात्र अशा कोणत्याही सिद्धांताला पूर्णपणे नाकारत आहेत. 2019 साली बुलेटिन ऑफ द सिस्मोलॉजिकल सोसायटी ऑफ अमेरिका एक शोधनिबंध प्रसिद्ध झाला होता. त्यानुसार ओअरफिशच्या उपस्थितीचा आणि भूपंपाचा कोणताही संबंध संशोधनात आढळला नाही. 2018 च्या एका अभ्यासानुसार हवामानात होत असलेल्या बदलांमुळे बरेचदा सागराच्या खोल पाण्यात राहणारे ओअरफिश पृष्ठभागावर येऊ शकतात. संकटाचा संदेश वगैरे पूर्णतः चुकीचा समज आहे.
