रिझर्व बँक ऑफ इंडियामध्ये होणाऱया ‘ऑफिस अटेंडंट’ पदाच्या नोकर भरतीमध्ये स्थानिक भूमिपुत्रांना प्राधान्य द्या, अशी मागणी शिवसेनाप्रणीत स्थानीय लोकाधिकार समिती महासंघाकडून करण्यात आली आहे.
आरबीआयमध्ये ऑफिस अटेंडंट पदासाठी मोठी भरती केली जाणार आहे. यामध्ये भूमिपुत्रांना न्याय मिळण्यासाठी स्थानीय लोकाधिकार समितीकडून पाठपुरावा सुरू आहे. या नोकर भरतीसाठी इच्छुक उमेदवारांना https://rbi.org.in या आरबीआयच्या वेबसाईटवर 4 फेब्रुवारीपर्यंत ऑनलाईन अर्ज करावे लागणार आहेत. या भरतीकरिता उमेदवार दहावी पास असावा. उमेदवाराचे वय सर्वसाधारण वर्गाकरिता शासकीय नियमानुसार राहणार आहे. तसेच आरक्षित प्रवर्गाकरिता कमाल वयोमर्यादित शासकीय नियमानुसार सवलत/शिथिलता असेल. सदर नोकरभरतीसाठी जास्तीत जास्त भूमिपुत्रांनी अर्ज करावेत, असे आवाहन महासंघाकडून करण्यात येत आहे.
उमेदवारांना मिळणार प्रशिक्षण
स्थानीय लोकाधिकार समिती महासंघाचे अध्यक्ष, शिवसेना सचिव, शिवसेना नेते-खासदार अनिल देसाई, महासंघ कार्याध्यक्ष विलास पोतनीस, आमदार सुनील शिंदे, महासंघ सरचिटणीस प्रदीप मयेकर यांच्या सूचनेनुसार सदर नोकरभरतीपूर्व परीक्षेचे ऑनलाईन/ऑफलाईन प्रशिक्षण वर्ग महासंघाकडून घेण्यात येणार आहेत. याबाबत अधिक माहितीसाठी शिवसेनाप्रणीत स्थानीय लोकाधिकार समिती महासंघ कार्यालय, शिवसेना भवन, पहिला मजला येथे रविवार व सुट्टीचे दिवस वगळून सायंकाळी 6.30 ते 8.30 या वेळेत चिटणीस शरद एक्के 9892699215, श्रीराम विश्वासराव 9869588469, विलास जाधव 9619118999, सुधाकर नर 8369442951 यांच्याशी संपर्प साधावा, असे आवाहन महासंघाचे चिटणीस व प्रशिक्षण वर्ग प्रमुख उमेश नाईक यांनी कळवले आहे.
