मुसळधार पावसामध्ये आज गणपतीपुळ्यात अंगारकी संकष्टीनिमित्त भाविकांचा जनसागर पहायला मिळाला. दर्शनासाठी मंदिराच्या आवारात प्रचंड मोठ्या रांगा लागल्या होत्या. सुमारे 80 हजार भाविकांनी दर्शन घेतले.
अंगारकी संकष्टीनिमित्ताने मंगळवारी श्रीदेव गणपतीपुळेचे मंदिर पहाटे साडेतीन वाजता खुले करण्यात आले. सुरुवातीला मुख्य पुजारी अमित घनवटकर यांच्या हस्ते श्रीची महापुजा करण्यात आली. मंत्रपुष्पांजली झाल्यानंतर भाविकांना मंदिरात दर्शनासाठी सोडण्यात आले. अंगारकी संकष्टीनिमित्ताने गर्दी होणार हे माहित असल्यामुळे मंदिर परिसरात भाविकांच्या दर्शनासाठी चोख व्यवस्था ठेवण्यात आली होती. दर्शनाच्या रांगांच्या ठिकाणी पावसापासून भाविकांचे संरक्षण व्हावे याकरीता पत्र्याची शेड उभारण्यात आली होती. गणपतीपुळे ग्रामपंचायतीच्या वतीने संपूर्ण मंदिर परिसरात विद्युत व्यवस्था सुरळीत ठेवण्यात आली होती.
पोलीस, जीवरक्षक आणि देवस्थानचे सुरक्षा रक्षक भाविकांच्या व्यवस्थेसाठी तैनात होते. सायंकाळी साडेचार वाजता श्रींच्या पालखीची ढोलताशांच्या गजरात भव्य मिरवणूक काढण्यात आली. मुसळधार पाऊस असतानाही मोठ्या संख्येने भाविक श्रींच्या दर्शनासाठी गणपतीपुळ्यात दाखल झाले होते.
