टीम इंडियाचा माजी क्रिकेटपटू सुरेश रैना याने क्रिकेटच्या सर्व प्रकारांमधून निवृत्ती स्वीकारत असल्याची घोषणा केली आहे. म्हणजेच रैना आता कसोटी, एकदिवसीय, टी-20 आणि आयपीएल अशा सगळ्या प्रकारातून निवृत्त होणार आहे.
रैना याने स्वतःच ट्वीट करून याची माहिती दिली आहे. यापूर्वी रैनाने 15 ऑगस्ट 2020 रोजी आंतरराष्ट्रीय क्रिकेटमधून निवृत्ती घेतली होती. पण, तो उत्तर प्रदेश संघासाठी देशांतर्गत स्पर्धांमध्ये खेळत होता. तसंच, आयपीएलमधूनही तो खेळताना दिसत होता. अर्थात 2022च्या आयपीएलच्या मोसमात त्याला कुणीही खरेदी केलं नव्हतं.
It has been an absolute honour to represent my country & state UP. I would like to announce my retirement from all formats of Cricket. I would like to thank @BCCI, @UPCACricket, @ChennaiIPL, @ShuklaRajiv sir & all my fans for their support and unwavering faith in my abilities 🇮🇳
— Suresh Raina🇮🇳 (@ImRaina) September 6, 2022
काही सूत्रांनी दिलेल्या माहितीनुसार, रैना आता परदेशी क्रिकेट लीगमध्ये खेळताना दिसू शकतो. त्यासाठी त्याने भारतीय क्रिकेट नियामक मंडळाचं ना हरकत प्रमाणपत्र मागितलं आहे. याआधी माजी क्रिकेटपटू युवराज सिंह देखील परदेशी लीगमध्ये खेळला आहे. रैना याचसोबत यंदा होणाऱ्या लिजंड्स क्रिकेट लीगमध्येही खेळताना दिसेल, अशी शक्यता वर्तवण्यात येत आहे.
