महानगरपालिका निवडणुकीच्या प्रचाराला वेग येत असताना ‘या परिसरात प्रचाराला का आले’ असे विचारत उमेदवार महिलेच्या सासऱ्याला प्रतिस्पर्धी उमेदवार महिलेच्या दिराने मारहाण केली. ही घटना शहरातील चौघुले प्लॉट परिसरात घडली. या प्रकरणी मारहाण करणारा आबा रमेश बाविस्कर (वाल्मीक नगर) याच्याविरुद्ध शनिपेठ पोलीस ठाण्यात अदखलपात्र गुह्याची नोंद करण्यात आली आहे.
प्रभाग क्रमांक 2 ‘ब’मधील राष्ट्रवादी काँग्रेसच्या उमेदवार रेखा भगवान सोनवणे या व त्यांचे पती भगवान उज्ज्वला सोनवणे, सासरे काशीनाथ धोंडू सोनवणे तसेच इतर नातेवाईक प्रचारासाठी चौघुले प्लॉट भागात गेले. त्यावेळी शिंदे गटाचे उमेदवार बाविस्कर यांचा दीर आबा रमेश बाविस्कर (रा. वाल्मीक नगर) हा तेथे आला. ‘तुम्ही येथे प्रचाराला का आला? तुम्ही येथे प्रचार करू नका,’ असे म्हणत त्याने शिवीगाळ करून काशीनाथ सोनवणे यांना मारहाण केली. तसेच ‘तू प्रचार केला तर जिवंत सोडणार नाही,’ अशी धमकी दिली, असे शनिपेठ पोलीस ठाण्यात दिलेल्या फिर्यादीमध्ये तक्रारदाराने म्हटले आहे. प्रचाराला मज्जाव करीत उमेदवार सोनवणे यांच्या नणंद संगीता वसंत कोळी यांनादेखील शिवीगाळ केल्याचे फिर्यादीत म्हटले आहे.
