जम्मू-कश्मीरमध्ये एकिकडे पुलवामा, बडगाम येथे चकमकी सुरू असताना श्रीनगर येथे पोलिसांच्या ताफ्यावर दहशतवाद्यांनी गोळीबार केला आहे. या गोळीबारात दोन पोलीस शहीद झाले आहेत.
येथील बाराजुल्ला परिसरात ही घटना घडली आहे. शुक्रवारी दुपारी दहशतवाद्यांनी पोलिसांच्या ताफ्यावर गोळीबार केला. त्यात जम्मू कश्मीर पोलीस दलाचे दोन कर्मचारी शहीद झाले.
या घटनेचं सीसीटीव्ही फुटेजही सापडलं आहे. या फुटेजमध्ये एक दहशतवादी एके – 47 घेऊन दबा धरून आहे. तो तेथील मुख्य बाजारातही शस्त्र घेऊन फिरताना दिसत आहे. या दहशतवाद्याची ओळख पटवून त्याला शोधण्याची मोहीम राबवली जात आहे. या दहशतवाद्याच्या जोडीला अन्य एक दहशतवादीही दिसत आहे.
Jammu and Kashmir: Unidentified people fire bullets at security forces in Baghat Barzulla of Srinagar district in Kashmir. More details awaited.
(Visuals deferred by unspecified time) pic.twitter.com/wQUDW9zWBE
— ANI (@ANI) February 19, 2021
गोळीबार केल्यानंतर ते तिथून फरार झाल्याचंही फुटेजमध्ये दिसत आहे. हे दोन्ही पोलीस कर्मचारी श्रीनगर विमानतळाला श्रीनगर शहराशी जोडण्यासाठी बनवण्यात येणाऱ्या रस्त्याच्या सुरक्षेसाठी तैनात होते. हे दहशतवादी शेजारच्याच एका गल्लीतून आले आणि त्यांनी पोलिसांवर गोळीबार केला, असं सुरक्षा दलांचं म्हणणं आहे.
पोलिसांनी या परिसराला घेरलं असून शोधमोहीम राबवण्यात येत आहे. 17 फेब्रुवारी रोजीही असाच दहशतवादी हल्ला करण्यात आला होता. त्यात तेथील ढाब्यावर काम करणारा एक कर्मचारी जखमी झाला होता.
