मुंबईतील चेंबूर परिसरात धक्कादायक घटना घडली आहे. शरीरसंबंधांना नकार दिल्याने पतीने पत्नीला जिवंत जाळण्याचा प्रयत्न केला. या घटनेमुळे परिसरात खळबळ उडाली आहे. या घटनेत गंभीर भाजलेल्या महिलेवर सायन रुग्णालयात उपचार सुरु आहेत. याप्रकरणी आरसीएफ पोलिसांनी पतीविरोधात हत्येचा प्रयत्न केल्याप्रकरणी गुन्हा दाखल केला आहे.
काय घडलं नेमकं?
चेंबूर परिसरात राहणारी पीडित महिला घरकाम करते. शुक्रवारी सकाळी नेहमीप्रमाणे ती कामावर जायला निघत होती. यावेळी तिच्या पतीने तिच्याकडे शरीरसंबंधांची मागणी केली. मात्र कामावर जायला उशिर होत असल्याचे सांगत पत्नीने याला नकार दिला. यामुळे पती-पत्नीमध्ये जोरदार वाद झाला. पतीने तिच्या चारित्र्यावर संशय घेतला.
पोलिसांनी दिलेल्या माहितीनुसार, रागाच्या भरात पत्नीने स्वतःवर रॉकेल ओतून घेतले. यानंतर आरोपीने तिच्यावर जळत्या कागदाचा तुकडा फेकला. यात महिलेची छाती, पोट, पाय आणि हात गंभीर भाजले. महिलेला तात्काळ सायन रुग्णालयात नेण्यात आले. तिची प्रकृती गंभीर आहे.
महिलेच्या तक्रारीवरून, आरसीएफ पोलिसांनी भारतीय न्याय संहिताच्या कलम 109(1), 352 आणि 115(2) अंतर्गत आरोपीविरुद्ध हत्येच्या प्रयत्नाचा गुन्हा दाखल केला आहे. या प्रकरणाचा अधिक तपास सुरू आहे.
