पंतप्रधान नरेंद्र मोदी हे संघाचे स्वयंसेवक आहेत, परंतु संघ स्वतंत्रपणे काम करणाऱ्या कोणत्याही व्यक्ती किंवा संस्थेवर नियंत्रण ठेवत नाही. मोदींसाठी राष्ट्रीय स्वयंसेवक संघ रिमोट कंट्रोल वापरत नाही. असे मत राष्ट्रीय स्वयंसेवक संघाचे (RSS) सरसंघचालक मोहन भागवत यांनी व्यक्त केले आहे. सरसंघचालकांनी शनिवारी जबलपूरमध्ये लोकांशी संवाद साधताना पंतप्रधान नरेंद्र मोदींबाबत महत्त्वपूर्ण माहिती दिली.
यावेळी मोहन भागवत म्हणाले की, जेव्हा कोणी आरएसएसबद्दल बोलतो तेव्हा लोक विश्व हिंदू परिषदेचा विचार करतात. खरंतर त्या संघटनेतही स्वयंसेवक आहेत आणि त्यांची विचारसरणीही तशीच आहे. संघ म्हटल्यावर लोक मोदींचेही नाव घेतात. मोदी हे आमचे स्वयंसेवक आहेत. संघ म्हटल्यावर तुम्हाला विश्व हिंदू परिषद दिसते. विश्व हिंदू परिषदेचेही स्वयंसेवक असून त्यांचे विचार आणि मूल्ये स्वयंसेवकांसारखीच आहेत, परंतु ही सर्व स्वयंसेवकांनी केलेली स्वतंत्र कामे आहेत. हे म्हणजे संघ नाही.
संघाचे एक वेगळे आणि स्वतंत्र काम आहे, असे सरसंघचालक म्हणाले. स्वयंसेवक सर्वत्र आहेत, म्हणून आमच्यात एक कनेक्शन आहे जे चांगल्या कामांना मदत करते. त्यामुळे संघाचे त्यांच्यावर प्रत्यक्ष किंवा अप्रत्यक्ष नियंत्रण नाही. यावेळी भागवत म्हणाले की, हिंदू धर्म हा धर्म नसून जीवनपद्धती आहे. ही एक परंपरा आहे जी विविध पंथ, जाती आणि प्रांतांनी जपली आहे.
