जागतिक क्रमवारीत अव्वल स्थानावर असलेला सर्बियाचा नोवाक जोकोविच याने एका वर्षी चार ग्रॅण्डस्लॅम जिंकण्याच्या दिशेने बुधवारी पाऊल टाकले. या दिग्गज टेनिसपटूने पुरुष एकेरीतील सलामीच्या लढतीत 18 वर्षीय होल्गर रून याच्यावर 6-1, 6-7, 6-2, 6-1 अशा चार सेटमध्ये विजय मिळवला आणि दुसऱया फेरीत प्रवेश केला. नोवाक जोकोविच याने दोन तास व 15 मिनिटांमध्ये प्रतिस्पर्ध्याला हरवले.
महिला एकेरीत बियांकाची आगेपूच
21 वर्षीय बियांका आंद्रेस्क्यू हिने महिला एकेरीत आगेपूच केली. कॅनडाच्या बियांका आंद्रेस्क्यू हिने पहिल्या फेरीत व्हिक्टोरिया गोलुबीच हिच्यावर 7-5, 4-6, 7-5 अशा फरकाने विजय मिळवला आणि घोडदौड केली. बियांका आंद्रेस्क्यू हिने 2019 साली अमेरिकन ओपन टेनिस ग्रॅण्डस्लॅम जेतेपदावर नाव कोरले होते. त्यानंतर ती या वर्षी या स्पर्धेत सहभागी झाली आहे.
