संयुक्त महाराष्ट्राच्या चळवळीपासून मुंबई महाराष्ट्रापासून तोडण्याचे कारस्थान सुरू आहे. आता तर पालघरपासून मुंबईपर्यंत सगळे मतदारसंघ अमराठी करून लपूनछपून मुंबई गुजरातला आंदण देण्याचा दिल्लीचा डाव आहे, सावध रहा, सतर्क रहा असा इशारा मनसेचे अध्यक्ष राज ठाकरे यांनी मराठी माणसांना दिला.
मीरा-भाईंदरमधील मराठी एकजूट मोर्चानंतर राज ठाकरे यांची आज नित्यानंदनगर येथे सभा झाली. यावेळी ते म्हणाले, मुख्यमंत्री देवेंद्र फडणवीस हे त्रिभाषा सूत्र आणणारच, असा हट्ट करत आहेत. हिंदीसाठी महाराष्ट्राचा मुख्यमंत्री का पेटलाय, असा सवाल करतानाच महाराष्ट्रात हिंदी सक्ती करून दाखवाच. तुमच्या सरकारला आत्महत्या करावी लागेल, असे आव्हानच राज ठाकरे यांनी फडणवीसांना दिले.
दुबे तुला डुबे डुबेके मारेंगे
मराठीबाबत अवमानकारक वक्तव्य करणाऱ्या भाजप खासदार दुबेचाही त्यांनी समाचार घेतला. मुंबईत येऊन दाखव, तुला इथल्या समुद्रात डुबे डुबेकर मारेंगे, असा इशारा राज ठाकरे यांनी दिला.
