नागरिकांना शिधापत्रिका काढण्यासाठी पारनेर तहसील कार्यालयाचे उंबरठे झिजवावे लागत आहेत. अनेक हेलपाटे मारूनही शिधापत्रिका मिळेल, याची शाश्वती नाही. मात्र, दुसरीकडे कुटुंबातील मृत व्यक्तीच्या नावाने नवीन शिधापत्रिका देण्याचा प्रकार उघडकीस आला आहे. या प्रकारामुळे पारनेर तहसील कार्यालयातील सावळा गोंधळ चव्हाटय़ावर आला आहे.
पारनेर तालुक्यात महसूल विभागाकडून जनतेला लागणारी विविध कागदपत्रे देण्यासाठी ‘शासन आपल्या दारी’ योजनेअंतर्गत गावागावांत शिबिरे घेण्यात आली. या शिबिरांत अनेकांनी शिधापत्रिका, आधार कार्ड तसेच इतरही दैनंदिन गरजेची कागदपत्रे मिळावीत, यासाठी अर्ज केले होते. त्यातील अनेकांना अद्यापि शिधापत्रिका मिळालेल्या नाहीत. मात्र, एका मृत व्यक्तीच्या नावाने त्याच्या कुटुंबीयाला शिधापत्रिका देण्यात आली आहे. या कुटुंबातील सदस्यांनी संबंधित मृत व्यक्तीचा मृत्यूचा दाखलाही पुरवठा विभागास दिला होता. मात्र, तरीही पुरवठा विभागाने शिधापत्रिका मृत व्यक्तीच्या नावाने तयार केल्याने कुटुंबातील सदस्यांना विनाकारण मनस्ताप सहन करावा लागला.
आठशे कुटुंबे शिधापत्रिकेच्या प्रतीक्षेत
z पारनेर तालुक्यातील किमान सातशे ते आठशे कुटुंबे शिधापत्रिका मिळण्यासाठी प्रतीक्षेत आहेत. शिधापत्रिका मिळाव्यात यासाठी मागील अनेक दिवसांपासून अनेक कुटुंबे तहसील कार्यालयात हेलपाटे मारत आहेत. मात्र, अधिकारी याकडे मात्र कानाडोळा करत आहेत.
कागदपत्रे तपासणीकडे दुर्लक्ष
z ज्या मृत व्यक्तीच्या नावाने शिधापत्रिका दिली गेली, त्या व्यक्तीचे 2022 मध्ये निधन झाले आहे. शिधापत्रिका देताना त्यावर 2023 असा उल्लेख आहे. त्यावर तहसीलदारांची सही आहे. याचा अर्थ शिधापत्रिका देताना कागदपत्रांची तपासणी केली नसल्याचे उघड होत आहे.
