काँग्रेसचे खासदार शशी थरूर यांना ‘वीर सावरकर’ यांच्या नावाचा पुरस्कार जाहीर करण्यात आला होता. मात्र, थरूर यांनी पुरस्काराचे स्वरूप आणि तो देणाऱ्या संस्थेबद्दल स्पष्टता नसल्याचे कारण देत हा सन्मान स्वीकारण्यास नकार दिला आहे.
या कार्यक्रमात सहभागी होणार का, असे विचारले असता, त्यांनी ‘मी जाणार नाही’ असे उत्तर दिले आणि नंतर एका सोशल मीडिया पोस्टमध्ये आपली भूमिका स्पष्ट केली.
थरूर यांनी पुढे सांगितले, ‘पुरस्काराचे स्वरूप, तो प्रदान करणारी संस्था किंवा इतर कोणत्याही संदर्भातील तपशिलांबद्दल स्पष्टता नसल्यामुळे, आजच्या कार्यक्रमाला उपस्थित राहण्याचा किंवा पुरस्कार स्वीकारण्याचा प्रश्नच उद्भवत नाही.’
‘वीर सावरकर इंटरनॅशनल इम्पॅक्ट अवॉर्ड २०२५’ (Veer Savarkar International Impact Award 2025) हा ‘हाय रेंज रुरल डेव्हलपमेंट सोसायटी’ (HRDS) या स्वयंसेवी संस्थेने (NGO) सुरू केला आहे आणि थरूर यांची याचे पहिले मानकरी म्हणून निवड झाली होती.
राष्ट्रीय विकास, सामाजिक सुधारणा आणि मानवतावादी कार्यांमध्ये बदल घडवून आणणाऱ्या व्यक्ती आणि संस्थांचा सन्मान करण्यासाठी संरक्षण मंत्री राजनाथ सिंह यांच्या हस्ते आज नवी दिल्लीतील एनडीएमसी कन्व्हेन्शन हॉलमध्ये या पुरस्काराचे वितरण होणार आहे.
थरूर म्हणाले की, ते काल केरळमध्ये असताना त्यांना प्रसारमाध्यमांमधून या पुरस्काराबद्दल माहिती मिळाली. स्थानिक प्रसारमाध्यमांनी विचारले असता, त्यांनी आपल्याला या पुरस्काराची माहिती नसल्याचे किंवा तो स्वीकारला नसल्याचे सांगितले.
पुरस्कार जाहीर करण्यापूर्वी आयोजकांनी त्यांच्याशी संपर्क साधला नाही, याबद्दल त्यांनी टीका केली. थरूर यांनी स्पष्ट केले, ‘मी पुरस्कार स्वीकारण्यास सहमती दर्शवलेली नसतानाही, माझे नाव जाहीर करणे आयोजकांच्या वतीने अत्यंत गैरजबाबदारपणाचे होते.’
त्यांच्या पोस्टमध्ये असेही म्हटले आहे की, ‘असे असूनही, आज दिल्लीतील काही प्रसारमाध्यमे तोच प्रश्न विचारत आहेत’.
थरूर यांनी अलीकडेच संसदेतील गोंधळ घालणाऱ्यांना खडसावले होते, काँग्रेसवर टीका करणारी मते व्यक्त केल्याने ते चर्चेत होते. मात्र, ते अजूनही काँग्रेस पक्षाचे सदस्य आहेत.
