अमेरिकेचे राष्ट्राध्यक्ष डोनाल्ड ट्रम्प यांनी कॅनडा आणि मेक्सिकोवरील आयात शुल्क पुन्हा महिनाभरासाठी पुढे ढकलले आहे. ट्रम्प यांनी 4 मार्चपासून दोन्ही देशांवर आयात शुल्क लागू करण्याचा निर्णय घेतला होता. दरम्यान, कॅनडातील लोकांनी अमेरिकन टोमॅटो आणि सफरचंद खाणे सोडून दिल्याचे चित्र आहे.
याआधी ट्रम्प यांनी कॅनडावर आयात शुल्क लागू करण्याच्या धमकीसह कॅनडाला अमेरिकेचे 51 वे राज्य बनवण्याची धमकी दिली होती, तेव्हापासून कॅनडातील नागरिकांनी अमेरिकेतील उत्पादनांवर बहिष्कार घालण्यास सुरुवात केली आहे. अमेरिकेतील टोमॅटो तसेच सफरचंदही खाणे कॅनडीयन नागरिकांनी सोडून दिल्याचे वृत्त आहे. इतकेच नाही तर कॅनडातील हॉटेल्स तसेच फूड आऊटलेट्समध्ये पिझ्झामध्ये अमेरिकन टोमॅटोऐवजी इटलीतून आलेले टोमॅटो वापरण्यास सुरुवात केली आहे. अनेक दुकानदारांनी तर अमेरिकेतील उत्पादने ठेवणेच बंद केले आहे.
दरम्यान, आयात शुल्क लागू करण्याच्या निर्णयानंतर अमेरिकेतील शेअर बाजारात पडझड दिसत असून बाजार 3.6 टक्क्यांनी घसरल्याचे दिसून आले.
हिंदुस्थान जगात सर्वाधिक आयात शुल्क आकारणारा हिंदुस्थान जगात सर्वाधिक आयात शुल्क आकारणारा देश असल्याचा पुनरुच्चार पुन्हा एकदा डोनाल्ड ट्रम्प यांनी केला आहे. हिंदुस्थान असो किंवा चीन जशास तसे आयात शुल्क आकारणारच, असे ट्रम्प यांनी म्हटले आहे. जगभरात अक्षरशः लुट सुरू असून कॅनडाही अमेरिकेच्या उत्पादनांवर भरमसाट शुल्क आकारत असल्याचा आरोप ट्रम्प यांनी केला.
