बृहन्मुंबई महानगरपालिका कर्मचाऱ्यांच्‍या सुखदुःखात आर्थिकदृष्‍ट्या त्‍यांच्‍या पाठीशी सदैव उभ्‍या राहणाऱ्या आणि अनेक राष्‍ट्रीय व राज्‍यस्‍तरीय पुरस्‍कारांनी गौरविण्‍यात आलेल्‍या ‘दि म्युनिसिपल को. ऑपरेटिव्ह बँक लिमिटेड’ द्वारे प्रामुख्याने बृहन्मुंबई महानगरपालिका कर्मचा-यांना बँकींग सुविधा दिली जाते. विशेष म्हणजे कर्मचारी सहकारी बँक गटातील आपल्या वर्गवारीत ही राज्यातील सर्वात मोठी कर्मचारी सहकारी बँक आहे. या बँकेमध्ये भरती प्रक्रिया सुरु असल्याबद्दल दिशाभूल करणारी व खोटी माहिती विविध समाजमाध्यमांवर प्रसारित होत आहे. या अनुषंगाने ‘दि म्युनिसिपल को. ऑपरेटिव्ह बँक लिमिटेड’ द्वारे कळविण्यात येत आहे की, बँकेमध्ये कोणत्याही प्रकारची भरती प्रक्रिया सध्या सुरु नाही.
समाजमाध्यमांवर प्रसारित होत असलेल्या खोट्या जाहिरातीमध्ये दि म्युनिसिपल को. ऑपरेटिव्ह बँकेमध्ये खुल्या प्रवर्गातील कॅशियर, शिपाई, शाखा व्यवस्थापक, व्यवस्थापक (आय.टी.), एएसटीटी, मॅनेजर (आय.टी.) आणि कार्यकारी सहाय्यक अशा विविध संख्येतील पदांकरीता भरती असल्याचे नमूद केले आहे. मात्र, सदर जाहिरात खोटी व दिशाभूल करणारी असून बँकेत भरती असल्यास बँकेच्या www.municipalbankmumbai.com या संकेतस्थळावर आणि अग्रगण्य वर्तमानपत्रामध्ये जाहिरात देण्यात येते. मात्र, सध्या बँकेमध्ये कोणतीही भरती प्रक्रिया सुरु नसल्याचे बँकेद्वारे कळविण्यात येत आहे, याची कृपया सर्व संबंधितांनी नोंद घ्यावी.
