सामना प्रतिनिधी । पारनेर
मी भाजपामध्ये प्रवेश करणार नाही, अथवा त्या पक्षाची उमेदवारीही घेणार नाही, असे सांगतानाच काँग्रेस आघाडीचा उमेदवार म्हणून निवडणूक लढविण्याचा आपली तयारी आहे, परंतु माझ्याऐवजी दुसरा उमेदवार आघाडीस मिळाला तर अपक्ष म्हणून लोकसभेच्या रिंगणात उतरणार असल्याचे डॉ. सुजय विखे यांनी भाळवणी येथे आयोजित करण्यात आलेल्या मेळाव्यात स्पष्ट केले.
काँग्रेसचे ज्येष्ठ नेते केरूभाऊ रोहकले यांच्या अध्यक्षतेखाली पार पडलेल्या या मेळाव्यास मोठा प्रतिसाद लाभला. सभापती राहुल झावरे, डॉ. भास्कर शिरोळे, राहुल शिंदे, वसंत सालके, सुलतानभाई शेख, डॉ. भाऊसाहेब खिलारी, सचिन वराळ, भाऊसाहेब रोहोकले, दगडू कपाळे, डॉ. विनायक सोबले, मारूती रेपाळे, डॉ. अजय येणारे, दिनेश बाबर, रामचंद्र मांडगे आदी यावेळी उपस्थित होते.
डॉ. विखे म्हणाले, माझ्या उमेदवारीस विरोध केला जात आहे, कारण मी सामान्य माणसाचा आवाज आहे. आरोग्य शिबिरांच्या माध्यमातून सामान्यांची सेवा करतो. प्रत्येक पक्षात चांगले व वाईट लोक असून राजकारण हा खोटे बोलण्याचा धंदा झाला आहे. काँग्रेस आघाडीने उमेदवारी दिली तर ती नम्रपणे स्वीकारीन मात्र कोणत्याही पुढाऱ्यासोबत रात्रीतून सेटलमेंट करणार नाही. मी खासदार होणार किंवा नाही हे जिल्हयातील चार पुढारी ठरवू शकत नाहीत. मतदारसंघातील साडेसतरा लाख मतदार ते ठरवतील. खोलीत बसून आदेश देणारे पुढारी माझे काहीच वाकडे करू शकणार नाहीत. आदेश देणारे वेडे व ते घेणारे त्यापेक्षाही वेडे, अशी खिल्ली उडवित असे आदेश ऐकून गेली 15 वर्षे मतदार संघात कधीही न फिरणारा, लोकसभेत न बोलणारा मुका व अदृष्य खासदार तुम्ही निवडून दिला आहे. माझ्या आजोबांवर, कुटुंबावर सामान्य माणसाने अतोनात प्रेम केले त्यांना न्याय मिळाला पाहिजे. यासाठी आपण निवडणुकीत उतरणार आहोत. माझा विरोध दिलीप गांधी यांना नाही. त्या पदावर बसलेल्या व्यक्तीचा उपयोग जनकल्याणसाठी झाला पाहिजे. दुर्देवाने त्या पदाचा उपयोग टक्केवारी गोळा करण्यासाठी होतो आहे. प्रस्तापित, टक्केवारी घेणाऱ्यांविरोधात मी आवाज उठविला असून मला निवडणून द्यायचे की नाही ते तुम्हीच ठरवा, असे ते म्हणाले.
स्वकर्तृत्वावर मते मागतोय, पुण्याईवर नाही!
डॉ. सुजय विखे स्वकर्तृत्वावर मते मागतो आहे. आजोबा तसेच वडील विरोधी पक्षनेते आई जि. प. अध्यक्ष यांचा मुलगा म्हणून कुटुंबाच्या पुण्याईवर लोकांपुढे गेलो नाही. महाराष्ट्रातील सर्वात उच्चशिक्षित पुढारी म्हणून माझी ओळख आहे. सगळे सुख, संसार त्यागून सामान्यांना न्याय देण्यासाठी मी राजकारणात पाऊल टाकले असल्याचे विखे यांनी सांगितले.
पहिला प्रश्‍न नदीजोड प्रकल्पाचा
लोकसभेत गेल्यानंतर पहिला प्रश्‍न नदीजोड प्रकल्पाचा उपस्थित करून जिरायत भागातील शेतकऱ्यांचा पाणी प्रश्‍न मार्गी लावण्यास प्राधान्य दिले जाईल. पहिल्या पाच वर्षाचा कार्यकाळ या प्रश्‍नासाठी गेला तरी चालेल मात्र हा प्रश्‍न आपण मार्गी लावू ,अशी ग्वाही विखे त्यांनी दिली.
