झाडं आमचे माय-बाप आहेत, त्यांच्यावर हल्ला कराल तर माफी नाही, असा इशारा ज्येष्ठ अभिनेते सयाजी शिंदे यांनी सरकारला दिला. सरकार यम आहे का? उठणार आणि झाडं तोडणार, असा संतप्त सवाल करीत त्यांनी वृक्षांना आलिंगन दिले. तपोवन वाचवण्यासाठी नाशिककरांसोबत असल्याची ग्वाही दिली.
महापालिका कुंभमेळ्यानिमित्त साधुग्राम उभारण्यासाठी तपोवनातील अठराशे झाडे तोडणार आहेत, याविरोधात नाशिककर एकवटले असून त्यांना पाठिंबा देण्यासाठी ज्येष्ठ अभिनेते, सह्याद्री देवराईचे प्रणेते, अजित पवार गटाचे सयाजी शिंदे यांनी शनिवारी सकाळी तपोवनाला भेट दिली. या वेळी ते प्रसारमाध्यमांशी बोलत होते. महापालिकेने आधी येथील झाडांवर फुल्या मारल्या, नंतर हिरवा रंग दिला, तुम्ही झाडांची आणि माणसांची चेष्टा करताय का, असा संताप व्यक्त केला. सरकारने येथे 220 कोटींचे टेंडर काढून एक्झिबिशन सेंटरचा घाट घातला आहे. असा कुठलाही छुपा अजेंडा राबवू नका, असे सुनावले. आपल्याच माणसांनी फसवलं तर त्यांना आपलं म्हणायचं का, हे इंग्रजांचं राज्य आहे का? असा सवाल केला.
दुश्मनी झाली तरी फरक पडत नाही
कुंभमेळा मंत्री गिरीश महाजन यांनी एका झाडाच्या बदल्यात पंधरा झाडं लावू, असे विधान केले, त्यावर सयाजी शिंदे म्हणाले की, मंत्र्यांच्या बोलण्यावर विश्वास ठेवण्यासारखी परिस्थिती उरलेली नाही. त्यांनी कितीही झाडे लावावीत, पण तपोवनातील एकही झाड तोडू देणार नाही. 33 वर्षांसाठी एक्झिबिशन सेंटरचं टेंडर काढलंय ना, त्aयाचं आधी उत्तर द्या. माझी-तुमची वैयक्तिक दुश्मनी नाही आणि झाली तरी मला फरक पडत नाही, असेही त्यांनी फटकारले.
