श्री विठ्ठल-रुक्मिणी मंदिरामध्ये प्रतिवर्षीप्रमाणे परंपरेनुसार मकरसंक्रांत उत्सव साजरा करण्यात येत आहे. मकरसंक्रांतीच्या उत्सवानिमित्त भोगीला म्हणजे (दि. 13) श्री रुक्मिणीमातेची काकडा आरती व नित्यपूजा पहाटे 3.00 ते 4.30 या वेळेत करण्यात येणार असून, माता व भगिनींना श्री रुक्मिणीमातेस भोगी करावयाची असेल, त्यांनी मंदिरामध्ये पहाटे 4.30 ते 5.30 या वेळेत करावी. त्यादिवशी पहाटे 5.30 नंतर श्री रुक्मिणीमातेस पोषाख व अलंकार परिधान करण्यात येतील व सकाळी 6.30 वाजेपर्यंत दर्शन सुरू करण्यात येणार असल्याची माहिती कार्यकारी अधिकारी राजेंद्र शेळके यांनी दिली.
भाविकांच्या सोयीच्या दृष्टीने 13 जानेवारी रोजी श्री विठ्ठलाकडील काकडा आरती व नित्यपूजा पहाटे 4.30 ते 5.45 या वेळेत होऊन, पदस्पर्श दर्शन पहाटे 6 नंतर सुरू करण्यात येणार आहे. 14 जानेवारी रोजी नेहमीच्या वेळेमध्ये मकरसंक्रांतीनिमित्त श्री रुक्मिणीमातेची काकडा आरती व नित्यपूजा झाल्यानंतर श्री रुक्मिणीमातेस अलंकार परिधान केल्यानंतर दर्शन सुरू करण्यात येणार आहे. तसेच 15 जानेवारी रोजी नेहमीप्रमाणे श्री रुक्मिणीमातेची काकडा आरती व नित्यपूजा नेहमीच्या वेळेत करण्यात येणार आहे. दि. 14 जानेवारी रोजी मकरसंक्रांतीनिमित्त जास्तीत जास्त महिला भाविकांना श्री विठ्ठल-रुक्मिणीमातेचे दर्शन सुलभ व्हावे, याकरिता पुरुष भाविकांनी शक्यतो मुखदर्शनाचा लाभ घ्यावा, असे आवाहन मंदिरे समितीच्या वतीने केले आहे.
सदरचा उत्सव मंदिर समितीचे सहअध्यक्ष गहिनीनाथ महाराज औसेकर यांच्या मार्गदर्शनाखाली पार पाडण्यात येत असल्याचे प्र. व्यवस्थापक संदेश भोसले यांनी सांगितले.
