शिवसेना आणि राष्ट्रवादी कॉँग्रेस पक्ष ही नावे आणि पक्ष चिन्हाबाबत सर्वोच्च न्यायालयात मागील साडेतीन वर्षांपासून ‘तारीख पे तारीख’चा खेळ सुरू आहे. या प्रकरणात पक्षकार असणारे उपमुख्यमंत्री एकनाथ शिंदे आणि उपमुख्यमंत्री अजित पवार यांच्याकडून सरन्यायाधीश सूर्य कांत यांचा सत्कार करण्यात आला. ज्यांच्यापुढे खटल्याची सुनावणी सुरू आहे त्यांचा सत्कार पक्षकारांनी केल्यामुळे सांगा, न्याय कसा मिळेल, अशी चर्चा समाजमाध्यमांत सुरू झाली आहे.
मुंबई उच्च न्यायालयाच्या वतीने सरन्यायाधीश सूर्य कांत यांच्या सत्काराचा सोहळा आज मुंबईत आयोजित करण्यात आला होता. या सत्कार सोहळय़ाला उपमुख्यमंत्री एकनाथ शिंदे आणि उपमुख्यमंत्री अजित पवार यांची विशेष उपस्थिती होती. केंद्रीय निवडणूक आयोगाने शिंदे गटाला शिवसेना हे पक्षाचे नाव आणि धनुष्यबाण हे चिन्ह दिले आहे, तर अजित पवार गटाला राष्ट्रवादी काँग्रेस हे नाव आणि घडय़ाळ हे पक्ष चिन्ह दिले आहे. या निर्णयाविरोधात सर्वोच्च न्यायालयात दाखल याचिकांवरील सुनावणी सातत्याने पुढे ढकलली जात आहे. यामुळे ज्या सरन्यायाधीश सूर्य कांत यांच्यापुढे सुनावणी सुरू आहे त्यांच्या सत्कार सोहळय़ाला शिंदे आणि अजितदादा यांनी विशेष उपस्थिती लावल्याने संशयाचा धुरळा उडाला आहे.
…तोपर्यंत लोकशाही सुरक्षित – एकनाथ शिंदे
न्यायप्रिय व्यक्ती सर्वोच्च पदावर असतील तोपर्यंत आपल्या संविधानाला आणि लोकशाहीला धोका नाही. न्यायमूर्ती सूर्य कांत यांचे कार्य सूर्याप्रमाणे प्रकाशमान असून सामान्य नागरिकांना न्यायाची ऊर्जा देणारे आहे, अशा शब्दांत उपमुख्यमंत्री एकनाथ शिंदे यांनी सरन्यायाधीशांचा गौरव केला.
विमानतळावरील स्वागतावरून प्रश्न
मुंबईत आलेल्या सरन्यायाधीश सूर्य कांत यांचे उपमुख्यमंत्री एकनाथ शिंदे यांनी विमानतळावर स्वागत केले. याचे फोटो शिंदे यांनी सोशल मीडियावर शेअर केले. सरन्यायाधीशांपुढे सुरू असणाऱ्या सुनावणीत पक्षकार असणारे शिंदे कसे काय स्वागत करू शकतात, अशी विचारणा होऊ लागली आहे.
…म्हणून तीन वर्षे तारीख पे तारीख – संजय राऊत
सरन्यायाधीश सूर्य कांत यांचे एकनाथ शिंदे यांनी विमानतळावर स्वागत केले. त्याबाबत शिंदे यांनी ट्विट केलेला फोटो रिपोस्ट करत शिवसेना नेते, खासदार संजय राऊत यांनी म्हणून तीन वर्षे तारीख पे तारीख, असा टोला लगावत सर्वोच्च न्यायालयात शिवसेना पक्ष आणि चिन्हाची अंतिम सुनावणी सातत्याने पुढे जात असल्याकडे लक्ष वेधले आहे.
