बॉलिवूडचा ‘मिस्टर परफेक्शनिस्ट’ आमिर खान लवकरच आयुष्याची नवी सुरुवात करणार आहे. प्रेयसी गौरी स्प्रॅटसोबत 5 जुलै रोजी विवाहबंधनात अडकणार असल्याची अधिकृत माहिती आमिरने स्वतः माध्यमांशी संवाद साधताना दिली. हा विवाहसोहळा मुंबईतील त्याच्या निवासस्थानी अत्यंत साधेपणाने आणि मोजक्या पाहुण्यांच्या उपस्थितीत पार पडणार आहे.
एका कार्यक्रमादरम्यान लग्नाविषयी विचारले असता आमिर म्हणाला, “हो, आमचं लग्न 5 जुलैला होत आहे. हा आमच्यासाठी अतिशय खास दिवस आहे. आम्ही हा सोहळा घरीच साजरा करत आहोत. दोन्ही कुटुंबांतील सदस्य आणि काही जवळचे मित्रच उपस्थित राहतील. सर्वांनी आम्हाला आशीर्वाद द्यावेत आणि आमच्या वैवाहिक आयुष्यासाठी शुभेच्छा द्याव्यात.”
यंदा मार्चमध्ये 60 व्या वाढदिवसानिमित्त आमिरने प्रथमच गौरी स्प्रॅटची माध्यमांशी ओळख करून दिली होती. त्यावेळी त्याने त्यांच्या नात्याची अधिकृत कबुली देत, अनेक वर्षांपासून दोघे एकमेकांना ओळखत असल्याचे सांगितले होते. त्यानंतर त्यांच्या लग्नाबाबत विविध चर्चा रंगल्या होत्या. आता स्वतः आमिरनेच लग्नाची तारीख जाहीर केल्याने त्या चर्चांवर शिक्कामोर्तब झाले आहे. असे वृत्त एबीपी न्यूज ने दिले आहे.
हे आमिर खानचे तिसरे लग्न असणार आहे. यापूर्वी त्याने रीना दत्ता यांच्याशी विवाह केला होता. त्यांना जुनैद आणि इरा ही दोन मुले आहेत. त्यानंतर त्याने चित्रपट निर्माती किरण राव यांच्याशी लग्न केले. त्यांना आझाद हा मुलगा असून 2021 मध्ये दोघे परस्पर संमतीने विभक्त झाले. गौरी स्प्रॅट मूळची बंगळुरूची असून ती फॅशन आणि उद्योजकता क्षेत्राशी संबंधित आहे. लंडनमध्ये शिक्षण घेतलेल्या गौरीचा पूर्वी विवाह झाला होता आणि तिला एक मुलगाही आहे. सध्या ती आमिर खान प्रॉडक्शन्सशी संबंधित कामात सक्रिय असल्याचे सांगितले जाते.
आता 5 जुलै रोजी होणाऱ्या या खासगी विवाहसोहळ्याकडे आमिरच्या चाहत्यांचे आणि बॉलिवूडमधील अनेकांचे लक्ष लागले आहे.
