देवदत्त पडिक्कलच्या दमदार शतकामुळे कसोटीच्या पहिल्याच दिवशी हिंदुस्थानला श्रीलंकेवर वर्चस्व राखता आले. पडिक्कल आणि केएल राहुल यांनी दीडशे धावांची दमदार भागीदारी रचली. त्यामुळेच हिंदुस्थानला पहिल्या दिवसाचा खेळ संपला तेव्हा 73 षटकांत 2 बाद 288 धावा अशी मजल मारता आली. पडिक्कलने नाबाद खेळी साकारल्यामुळे आता दुसऱ्या दिवशी तो द्विशतक झळकावणार का, याची उत्सुकता सर्वांना असेल. त्याचबरोबर जखमी निवृत्त झालेला राहुल दुसऱ्या दिवशी मैदानात उतरणार की नाही, याकडेही सर्वांचे लक्ष असेल.
राहुल आणि पडिक्कल यांची भागीदारी
यशस्वी जयस्वालने संघाला आक्रमक सुरुवात करून दिली खरी, पण धावबाद होत त्याने आत्मघात केला. यशस्वीला यावेळी 32 धावांवरच समाधान मानावे लागले. पण त्यानंतर राहुलची साथ देण्यासाठी आला तो पडिक्कल. या दोघांनी श्रीलंकेच्या गोलंदाजांची धुलाई करत डाव सावरला. या दोघांनी दुसऱ्या विकेटसाठी 150 धावांची भक्कम भागीदारी रचली. राहुलने 9 चौकार आणि एका षटकारासह 162 चेंडूंमध्ये 77 धावांची अत्यंत संयमी खेळी केली, पण तो दुखापतग्रस्त होऊन निवृत्त झाला.
गिल बाद, पण देवदत्तला पंतची साथ
राहुल बाद झाल्यानंतर चौथ्या क्रमांकावर फलंदाजीला आलेला कर्णधार शुभमन गिल फार काळ टिकला नाही. 28 चेंडूंमध्ये 16 धावा केल्यानंतर गिलला प्रभात जयसूर्याने बाद केले. कर्णधार बाद झाल्यानंतर यष्टिरक्षक-फलंदाज ऋषभ पंत क्रीजवर आला आणि त्याने वेगाने धावा जमवण्यास सुरुवात केली. पंत 3 चौकार आणि 1 षटकारासह 36 चेंडूंमध्ये 27 धावांवर नाबाद आहे.
देवदत्त ठरला नायक
कसोटीच्या पहिल्या दिवसाचा नायक ठरला तो देवदत्त. कारण त्याने आश्वासकपणे फलंदाजी करत संघाला आव्हानात्मक धावसंख्या उभारून देण्यात मोलाचा वाटा उचलला. देवदत्तने दिवसभर दमदार फटकेबाजी करत आपले शतक पूर्ण केले आणि आपली निवड सार्थ ठरवली. देवदत्तने 12 चौकार आणि एका षटकाराच्या मदतीने 178 चेंडूंमध्ये 131 धावा करत संघाच्या धावसंख्येला आकार दिला. आता पडिक्कलच्या फलंदाजीवर दुसऱ्या दिवशी सर्वांच्या नजरा असणार आहेत.
