जवाहरलाल नेहरू विद्यापीठाचा (जेएनयू) माजी विद्यार्थी उमर खालिद याला दिल्ली पोलिसांच्या विशेष कक्षाने बेकायदेशीर कृती (प्रतिबंध) कायदा (यूएपीए) अंतर्गत अटक केली आहे.
सूत्रांनी ‘द इंडियन एक्स्प्रेस’ला सांगितले की शनिवारी खालिद याला समन्स धाडण्यात आले आणि रविवारी लोडी कॉलनीतील विशेष सेल कार्यालयात चौकशीसाठी येण्यास सांगितले. पोलीस सूत्रांनी सांगितले की, ”यापूर्वी 31 जुलै रोजी त्याची चौकशी करण्यात आली, यावेळी त्यांचा फोन जप्त करण्यात आला होता. रविवारी तो एकच्या सुमारास आला आणि संध्याकाळी अटक होण्यापूर्वी चौकशी केली गेली.”
Umar Khalid has been booked under the Unlawful Activities Prevention Act (UAPA). https://t.co/EaA7fKLd6g
— ANI (@ANI) September 13, 2020
येत्या काही दिवसांत पोलीस त्याच्याविरूद्ध आरोपपत्र दाखल करू शकतात, अशी माहिती सूत्रांनी दिल्याचे या वृत्तात म्हटले आहे. सोमवारी दिल्लीच्या न्यायालयात हजर केले जाईल.
पोलिसांनी दिलेल्या माहितीनुसार, 6 मार्च रोजी गुन्हे शाखेच्या अंमली पदार्थ आणि औषध शाखेचे उपनिरीक्षक अरविंद कुमार यांना मिळालेल्या माहितीच्या आधारे खालिदविरोधात एफआयआर दाखल करण्यात आला होता.
एफआयआर सांगण्यात आले की, ईशान्य दिल्लीतील दंगलीत खालिद हा वेगवेगळ्या संघटनांशी संबंधीत दोन अन्य लोकांच्या “पूर्वनियोजित कट रचनेचा” एक भाग होता.
एफआयआरमध्ये म्हटले आहे की, “खालिद याने दोन वेगवेगळ्या ठिकाणी चिथावणीखोर भाषणे केल्याचा आरोप केला आणि आंतरराष्ट्रीय स्तरावर चर्चा व्हावी यासाठी म्हणून अमेरिकेचे राष्ट्राध्यक्ष डोनाल्ड ट्रम्प यांच्या दौऱ्यावेळी नागरिकांना रस्ते रोखण्याचे आवाहन त्याने केले. अल्पसंख्यांकांवर हिंदुस्थानात अत्याचार होत असल्याचे चित्र उभे करण्याचा त्याचा प्रयत्न होता.”
