महाराष्ट्रासह अवघ्या देशाचे आराध्य दैवत असणाऱ्या गणपती बाप्पाला शुक्रवारी (9 सप्टेंबर) भक्तीभावाने निरोप देण्यात आला. वाजत-गाजत, गुलाल उधळत बाप्पाचे विसर्जन करण्यात आले. गणेश भक्तांनी साश्रू नयनांनी बाप्पाला अलविदा म्हणत पुढच्या वर्षी लवकर येण्याचे त्याच्याकडून वचन घेतले. मात्र या गणपती विसर्जनाला अपघाताचे गालबोट लागले असून राज्यात वेगवेगळ्या घटनांमध्ये एकूण 20 जणांचा मृत्यू झाला आहे.
महाराष्ट्र पोलिसांनी दिलेल्या माहितीनुसार, राज्यात गणपती विसर्जनाच्या दरम्यान वेगवेगळ्या घटनांमध्ये 20 जणांचा मृत्यू झाला आहे. यातील 14 जणांचा मृत्यू विसर्जनादरम्यान पाण्यात बुडून झाला, तर चौघांचा मृत्यू वेगवेगळ्या अपघातात झाला. तसेच विसर्जन मिरवणुकीत आरती सुरू असताना झाड पडल्याने एका महिलेचा मृत्यू झाला, तर एका व्यक्तीचा सिमेंटच्या ब्लॉकवर पडल्याने मृत्यू झाला.
Maharashtra | Total of 20 people lost their lives in various incidents related to Ganpati Immersion across Maharashtra. While 14 died by drowning, 4 died in road accident, 1 died after a tree fell on her & another was killed after he fell on a cemented surface: Maharashtra Police https://t.co/M4g3M11Lyv
— ANI (@ANI) September 10, 2022
पनवेलमध्ये विसर्जनावेळी 11 जणांना शॉक
पनवेलमध्ये गणपती विसर्जनाला गालबोट लागले असून विसर्जन करत असताना विजेचा शॉकने 11 भाविक जखमी झाले आहेत. शहरातील वडघर खाडी परिसरात ही दुर्घटना घडली आहे. यातील सर्व जखमींना उपचारासाठी उपजिल्हा रुग्णालयात दाखल करण्यात आले आहे. तसेच काही जखमींना पनवेलमधील लाइफ लाइन रुग्णालयात हलवण्यात आले आहे. विसर्जन करताना समोरील विद्युत खांबाची वायर तुटल्याने गणेशभक्तांना विजेचा जोरदार धक्का बसल्याचे समजते.
हरियाणा-यूपीत 15 जणांचा बुडून मृत्यू
हरियाणा आणि उत्तर प्रदेशमध्ये शुक्रवारी गणपती विसर्जनादरम्यान 15 जणांचा बुडून मृत्यू झाला. मृतांमध्ये 4 मुलांचा समावेश आहे. तर बचाव पथकाला काही जणांना वाचवण्यात यश आले आहे. त्यांच्यावर रुग्णालयात उपचार सुरू आहेत. विसर्जनादरम्यान हरियाणातील महेंद्रगड जिल्ह्यात 4 तरुणांचा कालव्यात बुडून मृत्यू झाला. सोनीपत जिल्ह्यात तिघे यमुना नदीच्या प्रवाहात वाहून गेले. तर उत्तर प्रदेशच्या उन्नाव आणि संत कबीर नगरमध्ये 8 जणांचा बुडून मृत्यू झाला आहे.
