हरियाणाच्या कर्नालमध्ये पोलिसांनी आंदोलन करणार्‍या शेतकर्‍यांवर लाठीचार्ज केला आहे. कर्नाल जिल्ह्यातील कैमला येथे भाजपच्या वतीने शेतकरी संवाद कार्यक्रम आयोजित करण्यात आले होते. येथे हरियाणाचे मुख्यमंत्री मनोहरलाल खट्टर येणार होते व नवीन कृषी कायद्याचे फायदे शेतकऱ्यांना सांगणार होते.
मुख्यमंत्री खट्टर येथे पोहोचणार त्याआधी कृषी कायद्याचा विरोध करणारे आंदोलनकारी शेतकरी येथे पोहोचले. यावेळी आंदोलनकारी शेतकऱ्यांनी कृषी कायद्यांविरोधात घोषणाबाजी करत काळे झेंडे फडकवले. तसेच शेतकऱ्यांनी कार्यक्रम स्थळी मुख्यमंत्र्यांसाठी बांधलेल्या मंचाचीही तोडफोड केली आहे.
Karnal: Protesting farmers gather in Kaimla village where Haryana CM Manohar Lal Khattar will hold Kisan Mahapanchayat shortly.
Police use teargas to disperse protestors. pic.twitter.com/SxV5ivKKs9
— ANI (@ANI) January 10, 2021
यादरम्यान, हरियाणा पोलिसांनी शेतकऱ्यांची समजूत काढण्याचा प्रयत्न केला. मात्र शेतकरी या ठिकाणाहून मागे सरायला तयार नसल्याचे पाहून पोलिसांनी त्यांच्यावर लाठीचार्ज करत अश्रुधुराच्या गोळ्यांचा मारा केला.
मिळालेल्या माहितीनुसार, आंदोलक शेतकर्‍यांवर पोलिसांनी पाण्याचा मारा केला आहे. येथे तणावपूर्ण परिस्थिती निर्माण झाली असून घटनास्थळी मोठ्या संख्येने पोलिसांना फौजफाटा तैनात करण्यात आला आहे. दरम्यान, या घटनेनंतर मुख्यमंत्री मनोहरलाल खट्टर यांनी आपला दौरा रद्द केला आहे.
