कर्नाटक विधानसभा निवडणुकीचा निकाल 13 मे रोजी जाहीर झाला. भाजपचा पराभव करत काँग्रेसने येथे स्पष्ट बहुमत मिळवले. कर्नाटकमध्ये 113 ही मॅजिक फिगर आहे. सध्या काँग्रेसकडे 135 एवढे संख्याबळ असून भाजपला 65 जागांवर समाधान मानावे लागले. कर्नाटकचा निकाल लागल्यापासून पुढील मुख्यमंत्री कोण होणार याची चर्चा सुरू झाली. माजी मुख्यमंत्री सिद्धरामय्या (Siddaramaiah) आणि प्रदेशाध्यक्ष डी. के. शिवकुमार (DK Shivakumar) यांच्यामध्ये मुख्यमंत्रीपदासाठी रस्सीखेच सुरू आहे.
गेल्या तीन दिवसांपासून कर्नाटकची जनता नव्या मुख्यमंत्र्यांच्या नावाची घोषणा होण्याची वाट पाहतेय. आज मंगळवारी सायंकाळपर्यंत याबाबत निर्णय होण्याची शक्यता आहे. मुख्यमंत्रीपदासाठी सिद्धरामय्या आणि डी. के. शिवकुमार यांच्यात चूरस आहे. दोन्ही बाजुने जोरदार फिल्डिंगही लावण्यात आली आहे. मात्र याबाबत अंतिम निर्णय सोनिया गांधी आणि राहुल गांधी यांच्या सल्ल्यानंतर घेतला जाईल.
Karnataka Congress president DK Shivakumar to go to Delhi today amid a cliffhanger regarding the decision on Karnataka CM. While Congress leader Siddaramaiah arrived in Delhi yesterday, Shivakumar stayed in Bengaluru due to a stomach infection.
(File Photo) pic.twitter.com/vKmClxdv36
— ANI (@ANI) May 16, 2023
मुख्यमंत्रीपदाचे दावेदार सिद्धरामय्या हे सोमवारी दिल्लीला पोहोचले. यानंतर आता डी. के. शिवकुमारही दिल्लीत पोहोचणार आहेत. सोमवारी त्यांनी पोटदुखीचे कारण सांगून दिल्लीला जाणे टाळले होते. मात्र आज ते दिल्ली पोहोचणार असून त्यानंतर मुख्यमंत्रीपदाच्या नावावर शिक्कामोर्तब होईल. मुख्यमंत्रीपदाबाबत त्यांना विचारले असता ते म्हणाले की, माझ्याकडे एकही आमदार नसून मी बंड किंवा ब्लॅकमेल करत नाही.
माझ्या नेतृत्वाखाली कर्नाटकमध्ये काँग्रेसचे 135 आमदार निवडून आले आहेत. त्या सर्वांनी एकमुखाने मुख्यमंत्रीपदाचा निर्णय हायकमांडवर सोपवला आहे. माझ्याकडे वैयक्तीक पाठिंबा देणारा एकही आमदार नाही. जे आहेत ते सर्व काँग्रेसचे आमदार आहेत. मी सोनिया गांधी, राहुल गांधी आणि मल्लिकार्जुन खरगे यांना कर्नाटकमध्ये काँग्रेसला सत्तेपर्यंत पोहोचवण्याचे आश्वासन दिले होते आणि मी ते पूर्ण केले, असे शिवकुमार म्हणाले.
दरम्यान, कर्नाटकमधील मुख्यमंत्रीपदाचा पेच सोडवण्यासाठी काँग्रेसने महाराष्ट्राचे माजी मुख्यमंत्री सुशील कुमार शिंदे, जितेंद्र सिंह आणि दीपक बाबरिया यांची पर्यवेक्षक म्हणून नेमणूक केली होती. त्यांनी आपला अहवाल काँग्रेस अध्यक्ष मल्लिकार्जुन खरगे यांच्याकडे सोपवला आहे. याच दरम्यान, सिद्धरामय्या यांनी पहिली दोन वर्ष आपल्याला, आणि उर्वरित तीन वर्ष शिवकुमार यांना मुख्यमंत्रीपद द्यावे असा फॉर्म्युला मांडला आहे. त्यामुळे आता काँग्रेस हायकमांड काय निर्णय घेणार याकडे सर्वांचे लक्ष लागले आहे.
