बंदी घातलेला खलिस्तान समर्थक गट शिख फॉर जस्टिस (SFJ) चा नेता दहशतवादी गुरपतवंत सिंग पन्नून याने इंडो-कॅनडियन हिंदूंना देश सोडून हिंदुस्थानात परत जाण्याची धमकी दिली आहे.
हिंदुस्थान आणि कॅनडा यांच्यातील मोठ्या राजनैतिक वादाच्या दरम्यान व्हायरल झालेल्या व्हिडीओमध्ये पन्नून असं म्हणताना दिसत आहे की, ‘इंडो-कॅनेडियन हिंदूंनो, तुम्ही कॅनडा आणि कॅनडाच्या संविधानावरील तुमची निष्ठा नाकारली आहे. तुमचे गंतव्यस्थान हिंदुस्थान आहे. कॅनडा सोडा, हिंदुस्थानात जा.’
‘खलिस्तान समर्थक शीख नेहमीच कॅनडाशी एकनिष्ठ राहिले आहेत. त्यांनी नेहमीच कॅनडाची बाजू घेतली आहे आणि त्यांनी नेहमीच कायदे आणि संविधानाचे समर्थन केले आहे’, असं तो पुढे म्हणताना दिसत आहे.
कॅनडाचे पंतप्रधान जस्टिन ट्रूडो यांनी जूनमध्ये खलिस्तानी दहशतवादी हरदीपसिंग निज्जरच्या हत्येचा हिंदुस्थानी सरकारच्या एजंटवर ‘संभाव्य दुवा’ असल्याचा आरोप केल्यानं पन्नूनची नवी धमकी आली आहे.
पन्नूननं, ताज्या व्हिडीओमध्ये, हरदीपसिंग निज्जरच्या हत्येसाठी हिंदुस्थानचे उच्चायुक्त वर्मा जबाबदार असल्यास, मतदानासाठी सार्वमत घेण्यासाठी 29 ऑक्टोबर रोजी सर्व कॅनेडियन शीखांना व्हॅनकुव्हरमध्ये एकत्र येण्याचं आवाहन केलं.
खलिस्तानी संघटनांनी यापूर्वी कॅनडात सार्वमत आयोजित केले आहे. हिंदुस्थानं या मुद्द्यावर वारंवार चिंता व्यक्त केली आहे आणि कॅनडासमोर हा मुद्दा उपस्थित केला आहे. खलिस्तानींनीही हिंदुस्थानी मुत्सद्दी आणि नेत्यांना उघडपणे धमक्या दिल्या आहेत.
आठवड्याभरापूर्वी, गुरपतवंत सिंग पन्नून याने कॅनडातील एका मेळाव्यात पंतप्रधान नरेंद्र मोदी, गृहमंत्री अमित शहा, परराष्ट्र मंत्री एस जयशंकर यांच्यासह इतर प्रमुख नेत्यांना धमक्या दिल्या होत्या.
एका व्हिडीओमध्ये तो म्हणाला की, ‘जी-20 राष्ट्रांनो, तुमची 10 सप्टेंबर रोजी दिल्लीत बैठक होणार आहे, तेव्हा आम्ही कॅनडात खलिस्तान सार्वमत आयोजित करू’.
