विदर्भात भारतीय जनता पक्षाला जबरदस्त झटका बसला असून नागपूरनंतर आता अमरावती शिक्षक मतदारसंघाची जागाही भाजपने गमावली आहे. भाजप आणि संघाचा बालेकिल्ला म्हणून समजल्या जाणाऱ्या विदर्भातील दोन्ही जागांवर महाविकास आघाडीने बाजी मारली आहे. मविआचे सुधाकर आडबाले यांनी नागपूर शिक्षक मतदारसंघात भाजप समर्थीत नागो गाणार यांना पराभवाची धुळ चारली, तर अमरावती शिक्षक मतदारसंघात मविआचे धीरज लिंगाडे यांनी भाजपच्या रणजीत पाटील यांचा पराभव केला.
अमरावती शिक्षक मतदारसंघामध्ये जोरदार चूरस पाहायला मिळाली. गुरुवारी सकाळी सुरू झालेली मतमोजणी शुक्रवारी दुपारी संपली. तब्बल 30 तास मतमोजणी सुरू होती. त्यानंतर निवडणुकीचा निकाल समोर आला असून मविआच्या धीरज लिंगाडे यांनी भाजपच्या रणजीत पाटील यांचा दारुण पराभव केला. धीरज लिंगाडे यांना या निवडणुकीत एकूण 46 हजार 330 मते मिळाली. तर रणजीत पाटील यांना 42 हजार 962 मते मिळाली.
