निठारी हत्याकांड प्रकरणी अलाहाबाद उच्च न्यायालयाने सोमवारी दोन प्रमुख आरोपींची निर्दोष मुक्तता केली. न्यायालयाने आरोपी सुरेंद्र कोलीला त्याच्याविरुद्धच्या 12 खटल्यांमध्ये निर्दोष ठरवले, तर सहआरोपी मोनिंदरसिंग पंढेर हा त्याच्याविरुद्धच्या दोन खटल्यांमध्ये निर्दोष ठरला. त्यामुळे कोली आणि पंधेर यांना सुनावण्यात आलेली फाशीची शिक्षा रद्द करण्यात आली आहे.
निठारी हत्याकांड अलीकडील हिंदुस्थानच्या इतिहासातील सर्वात भयंकर मानले जाते.
2006 मध्ये मोनिंदर सिंग पंढेर यांच्या उत्तर प्रदेशातील नोएडा येथील निवासस्थानात आणि आजूबाजूला अनेक मानवी अवशेषांचा खच आढळला होता. या प्रकरणाच्या गंभीर तपशीलाने सर्वत्र धक्का बसला. त्यानंतर आणि कोली आणि पंढेर यांना अटक आणि त्यानंतर दोषी ठरवण्यात आले.
सीबीआयच्या विशेष न्यायालयाने मुख्य आरोपी सुरेंद्र कोली याला फाशीची तर सहआरोपी मोनिंदर पंढेर याला सात वर्षांच्या कारावासाची शिक्षा सुनावली होती. याशिवाय न्यायालयाने कोली याला 40 हजार रुपयांचा तर मोनिंदरला चार हजार रुपयांचा दंड ठोठावला आहे. सीबीआय कोर्टाचा हा निर्णय निठारी प्रकरणाशी संबंधित 14 व्या प्रकरणात दिला होता. सुरेंद्र कोलीला याआधी 13 गुह्यांमध्ये फाशीची शिक्षा झाली असून तीन प्रकरणांत पुराव्यांअभावी निर्दोष मुक्तता करण्यात आली होती.
निठारी हत्याकांड आणि दोषी
मोनिंदरसिंग पंढेर आणि त्याचा घरगुती नोकर सुरेंद्र कोली यांना 29 डिसेंबर 2006 रोजी पोलिसांनी बेपत्ता मुलांचे सांगाडे आणि इतर सामान नोएडाच्या निठारी परिसरात त्यांच्या घराबाहेरील नाल्यातून सापडल्यानंतर अटक केली होती.
बलात्कार, हत्या आणि आपल्या पीडितांचे अवशेष घराच्या अंगणात आणि नाल्यात टाकल्याचा आरोप असलेल्या कोलाला कनिष्ठ न्यायालयाने फाशीची शिक्षा सुनावली होती. अलाहाबाद उच्च न्यायालयाने ही शिक्षा कायम ठेवली आणि 15 फेब्रुवारी 2011 रोजी सर्वोच्च न्यायालयाने त्याची पुष्टी केली.
कोली हा ‘सिरियल किलर असल्याचे दिसत आहे’, असे धरून न्यायालयाने ‘त्याला कोणतीही दयामाया दाखवली जाऊ शकत नाही’ असे म्हटले होते. विशेष म्हणजे कोली आणि त्याचा मालक मोनिंदर सिंग पंढेर यांच्यावरही नरभक्षक आणि नेक्रोफिलाचे आरोप होते.
कोलीवर एकूण 16 गुन्हे दाखल असून त्यापैकी 12 प्रकरणांमध्ये त्याला फाशीची शिक्षा सुनावण्यात आली.
निठारी मालिका हत्याकांडातून उद्भवलेल्या काही प्रकरणांमध्ये पंढेरला दोषी ठरवण्यात आले होते आणि काही प्रकरणांमध्ये त्यांची निर्दोष मुक्तता करण्यात आली होती. पंढेर यांनी दोन खटल्यांमध्ये ट्रायल कोर्टाने सुनावलेल्या फाशीच्या शिक्षेला अलाहाबाद उच्च न्यायालयात आव्हान दिले होते.
