ताडदेवच्या क्रिसेंट टॉवरमधील आलिशान घरे म्हाडासाठी तापदायक ठरतायत. दोन वेळा सोडत काढूनही येथील सात घरांची विक्री न झाल्यामुळे या धूळ खात पडलेल्या घरांच्या मेंटेनन्सपोटी म्हाडाच्या तिजोरीतून दरमहा सुमारे दीड लाख रुपये खर्च होत आहेत. या घरांमुळे गेल्या तीन वर्षांत म्हाडाला 35 ते 40 लाख रुपयांचा भुर्दंड सहन करावा लागला आहे. त्यामुळे या महागड्या घरांची विक्री करायची कशी, असा पेच प्राधिकरणापुढे आहे.
मुंबई इमारत दुरुस्ती आणि पुनर्रचना मंडळाकडून ताडदेवच्या क्रिसेंट टॉवरमधील महागडी घरे म्हाडाच्या मुंबई मंडळाला सोडतीसाठी मिळाली आहेत. म्हाडाने पहिल्यांदा 2023 च्या सोडतीत येथील सात घरांचा समावेश केला होता. 7 कोटी 52 लाख ते 7 कोटी 57 लाख या दरम्यान घरांच्या किमती ठेवल्या होत्या. विक्री न झाल्याने पुन्हा 2024 च्या सोडतीत येथील सहा घरांचा समावेश करण्यात आला. त्यावेळी या घरांच्या किमती कमी करून त्या 5 कोटी 34 लाख ते 6 कोटी 77 लाख यादरम्यान ठेवल्या. किमती कमी केल्यामुळे तब्बल 43 अर्ज आले होते. त्यामुळे यंदा तरी या घरांची विक्री होईल अशी म्हाडाला आशा होती, परंतु एकाही विजेत्याने स्वीकृती न दर्शवल्याने ही घरे विक्रीविना धूळ खात पडली आहेत.
‘प्रथम येणाऱ्यास प्रथम प्राधान्य’ तत्त्वावर विक्री?
क्रिसेंट टॉवरमधील या कोट्यवधी रुपयांच्या घरांना लॉटरीत प्रतिसाद न मिळाल्यामुळे आता ‘प्रथम येणाऱ्यास प्रथम प्राधान्य’ या तत्त्वावर या घरांची विक्री केली जाऊ शकते. मार्केटपेक्षा म्हाडाची किंमत कमी असल्यामुळे कदाचित याच इमारतीमधील लोक ही घरे घेण्यासाठी पुढाकार घेऊ शकतात, अशी शक्यता एका अधिकाऱ्याने वर्तवली आहे.
