पुणे शहरातील कल्याणीनगर अपघातप्रकरणी मोठी अपडेट समोर आली आहे. पोर्शे कारने तरुण-तरुणीला चिरडणाऱ्या अल्पवयीन आरोपीच्या ब्लड रिपोर्टमध्ये फेरफार केल्याप्रकरणी पोलिसांनी ससून रुग्णालयाच्या फॉरेन्सिक लॅबचे एचओडी डॉ. अजय तावरे आणि अन्य एका डॉक्टरला बेड्या ठोकल्या आहेत. पुणे पोलीस आयुक्त अमितेश कुमार यांनी ही माहिती दिली असून ‘एएनआय’ने याबाबत वृत्त दिले आहे.
कल्याणीनगर परिसरात अल्पवयीनाने बेदरकारपणे पोर्शे कार चालवून तरूणीसह दोघांचा जीव घेतल्याची घटना रविवारी 19 मे रोजी पहाटेच्या सुमारास घडली. याप्रकरणी दररोज नवनवीन खुलासे होत असून धनिकपुत्राच्या सेवेसाठी कोणीकोणी पुढाकार घेतला हे देखील समोर येत आहे.
उद्योजक विशाल अग्रवाल याने लाडक्या मुलाला वाचवण्यासाठी पोलीस ठाण्यातील कर्मचाऱ्यांची मदत घेतल्याचा आरोप होत होता. त्यानंतर दोन पोलिसांचे निलंबनही करण्यात आले. तसेच या धनिकपुत्रासाठी ससूनमधील डॉक्टरही राबल्याचे समोर आले आहे. अपघातानंतर मुलाच्या ब्लड रिपोर्टमध्ये फेरफार केल्याच्या आरोपातून ससूनमधील फॉरेन्सिक लॅबचे एचओडी डॉ. अजय तावरे आणि डॉ. श्रीहरी हरलोर यांना अटक करण्यात आली आहे.
Pune car accident case | Two Doctors of Sassoon General Hospital in Pune have been arrested on the charge of manipulation of blood sample: Pune Police Commissioner Amitesh Kumar
— ANI (@ANI) May 27, 2024
धंगेकरांचे ट्विट
पुण्यातील कल्याणीनगर कार अपघात प्रकरणात ससुन रुग्णालयाच्या 2 डॉक्टरांना अटक करण्यात आली आहे. ब्लड रिपोर्टमध्ये फेरफार केल्याचा त्यांच्यावर आरोप आहे. तुम्हाला आम्हाला काही तासात मिळणारे ब्लड रिपोर्ट या केसमध्ये जेव्हा 7 दिवस होऊनही मिळत नव्हते तेव्हाच हा प्रकार संशयास्पद वाटत होता. याच ससूनमध्ये मयत अश्विनी कोस्टा यांच्या नातेवाईकांनी मृतदेह अजून अर्धा तास शवगृहात ठेवा आमची अँब्युलन्स येत आहे, अशी विनंती केली होती. मात्र रुग्णालय प्रशासनाने अर्धा तास वाढवून द्यायला देखील नकार दिला होता. असो, हे वाटतं तेवढे सोप्पं नाहीये. त्या रात्री अनेकांनी आपले ईमान विकले आहेत. जे आता हळू हळू जगासमोर येतील, असे ट्विट काँग्रेस आमदार रविंद्र धंगेकर यांनी केले आहे.
पुण्यातील कल्याणीनगर कार अपघात प्रकरणात ससुन रुग्णालयाच्या 2 डाॕक्टरांना अटक करण्यात आली आहे.
ब्लड रिपोर्ट मधे फेरफार केल्याचा त्यांच्यावर आरोप आहे.तुम्हाला आम्हाला काही तासात मिळणारे ब्लड रिपोर्ट या केसमध्ये जेव्हा ७ दिवस होऊनही मिळत नव्हते तेव्हाच हा प्रकार संशयास्पद वाटत…
— Ravindra Dhangekar Official (@DhangekarINC) May 27, 2024
