लोकसभा निवडणुकीतील हाराकिरीनंतर राज्यात मंत्रिमंडळ विस्ताराचे वारे वाहू लागले आहेत. यासंदर्भाने बोलताना महायुतीचा घटक असलेल्या रयत क्रांती संघटनेचे नेते, माजी मंत्री सदाभाऊ खोत यांनी आयाराम आणि गयारामांचे किती लाड पुरवणार, असा सवाल भाजपला करत थेट मंत्रिपदाची मागणी केली आहे.
लोकसभा निवडणुकीत आम्हाला जाणवले की, आयाराम गयाराम यांचे किती लाड पुरवावेत यालाही काही निर्बंध असणं गरजेचं आहे. शेतमजूर आणि बारा बलुतेदार यांचं नेतृत्व आम्ही करतो, मग त्याचं प्रतिबिंब हे येणाऱया मंत्रिमंडळाच्या विस्तारामध्ये उमटले पाहिजे. अन्यथा आमचे कार्यकर्ते फक्त लढण्यापुरतेच आहेत का अशी भावना निर्माण होईल, असे सदाभाऊ खोत यांनी म्हटले आहे.
