डोंबिवलीच्या खंबाळपाड्यात सर्पदंशाने चार वर्षांच्या चिमुकलीसह तिच्या २३ वर्षीय मावशीचा मृत्यू झाल्याची घटना दोन दिवसांपूर्वी घडली होती. पालिकेच्या रुग्णालयात अपुऱ्या सुविधा असल्याने या दोघींना कळव्याच्या छत्रपती शिवाजी महाराज रुग्णालयात हलविण्यास सांगितले. यात वेळ गेल्याने दोघींचा मृत्यू झाला. या घटनेनंतर आक्रमक झालेल्या शिवसेनेच्या (उद्धव बाळासाहेब ठाकरे) शिव आरोग्य सेनेने पालिकेच्या प्रभारी वैद्यकीय अधिकारी डॉ. दीपा शुक्ल यांची भेट घेत पालिकेच्या सर्व रुग्णालयांमध्ये तत्काळ उपाययोजना करण्याची मागणी केली.
सुट्टी असल्याने चार वर्षांची प्रणवी आपली मावशी श्रुती ठाकूर हिच्याकडे गेली होती. रात्री झोपेत असताना या दोघींना सर्पदंश झाला. त्यांना तत्काळ शास्त्रीनगर येथील रुग्णाल यात नेण्यात आले, परंतु अपुऱ्या सुविधांअभावी तेथील डॉक्टरांनी या दोघींना कळवा येथील छत्रपती शिवाजी महाराज रुग्णालयात हलवण्याचा सल्ला दिला. या फरफटीत वेळेत उपचार न झाल्याने सर्पदंश झालेल्या दोघींना आपला जीव गमवावा लागला.
याची गंभीर दखल घेत शिव आरोग्य सेनेचे ठाणे जिल्हा संपर्क समन्वयक डॉ. प्रशांत भुईंबर, जिल्हा समन्वयक एकनाथ अहिरे, कल्याण जिल्हा सहसमन्वयक अजित माने, विधानसभा समन्वयक अजिम शेख, शिवसेना शहर विधानसभा सहसंघटक रुपेश भोईर, कल्याण उपशहरप्रमुख राजू दीक्षित, दिनेश शेटे, विभागप्रमुख राजेश महाले, विकास रोकडे, ग्राहक संरक्षण कक्षाचे जिल्हा संघटक प्रथमेश पुण्यार्थी यांच्या उपस्थितीत प्रभारी वैद्यकीय अधिकारी डॉ. दीपा शुक्ल यांना निवेदन देण्यात आले.
