इंग्लंडचा वेगवान गोलंदाज स्टुअर्ट ब्रॉड याने कसोटी क्रिकेटमध्ये नवा माइलस्टोन गाठला आहे. कसोटी क्रिकेटमध्ये सर्वाधिक विकेट घेणाऱ्या गोलंदाजांच्या यादीमध्ये त्याने पाचव्या स्थानावर झेप घेतली आहे. लंडनच्या केनिंग्टन ओव्हल मैदानावर दक्षिण आफ्रिकेविरुद्ध सुरू असलेल्या कसोटी लढतीत त्याने ही कामगिरी नोंदवली.
इंग्लंड आणि दक्षिण आफ्रिका संघात तीन कसोटी सामन्यांच्या मालिकेतील तिसरा सामना लंडनच्या केनिंग्टन ओव्हल मैदानावर सुरू आहे. या कसोटीच्या पहिल्या डावात चार बळी घेत स्टुअर्ट ब्रॉड याने ऑस्ट्रेलियाचा वेगवान गोलंदाज ग्लेम मेग्राथ याच्या कसोटी बळींच्या विक्रमाची बरोबरी साधली होती. आज चौथ्या दिवशी दक्षिण आफ्रिकेच्या दुसऱ्या डावात ब्रॉडने डिन एल्गर याला बाद करत मेग्राथला मागे सोडले आणि पाचव्या स्थानावर झेप घेतली.
Milestone alert 🚨
Stuart Broad now has the second-highest wickets for a pacer (564) in Test cricket 👏#ENGvSA | #WTC23 |https://t.co/N8y2VlhyID pic.twitter.com/sEb6Oit4Zr
— ICC (@ICC) September 11, 2022
अँडरसननंतर तोच…
कसोटी क्रिकेटमध्ये सर्वाधिक बळी घेणाऱ्या पहिल्या पाच गोलंदाजांमध्ये दोन वेगवान गोलंदाजांचा समावेश आहे. विशेष म्हणजे दोन्ही गोलंदाज इंग्लंडचे आहेत. जेम्स अँडरसन 665 कसोटी बळींसह या यादीत तिसऱ्या आणि स्टुअर्ट ब्रॉड 564 बळींसह पाचव्या स्थानावर विराजमान आहे. पहिल्या स्थानावर मुथय्या मुरलीधरन (800 बळी), दुसऱ्या स्थानावर शेन वॉर्न (708 बळी) आणि चौथ्या स्थानावर अनिल कुंबळे (619 बळी) आहे.
ग्लेन मेग्राथ उर्फ पिजन (कबूतर)
ऑस्ट्रेलियाचा माजी वेगवान गोलंदाज ग्लेम मेग्राथ याला क्रिकेटमध्ये पिजन अर्थात कबूतर या नावाने ओळखले जाते. ताडमाड उंची आणि सडपातळ शरीरयष्टी यामुळे त्याला हे नाव मिळाले होते. कसोटी क्रिकेटमध्ये त्याच्या नावावर 124 लढतीत 563 बळींची नोंद आहे.
