टीम इंडिया आणि इंग्लंड यांच्यामध्ये 20 जून पासून पाच सामन्यांची कसोटी मालिका सुरू होणार आहे. परंतु या करंडकाच्या नावात बदल केल्यामुळे या मालिकेची सध्या जोरदार चर्चा सुरू आहे. मास्टर ब्लास्टर सचिन तेंडुलकर आणि जेम्स ऍण्डरसन यांचे नाव हिंदुस्थान आणि इंग्लंड यांच्यात होणाऱ्या पतौडी करंडकाला देण्यात आलं आहे. नावात झालेल्या या बदलामुळे हिंदुस्थानचे माजी कर्णधार आणि समालोचक सुनील गावसकर यांनी नाराजी व्यक्त केली आहे.
हिंदुस्थान आणि इंग्लंड यांच्यात 2007 साली पार पडलेल्या कसोटी मालिकेला पतोडी करंडक असे नाव देण्यात आलं होते. मात्र, आता इंग्लंड क्रिकेट बोर्डाने (ECB) हे नाव हटवण्याचा निर्णय घेतला आहे. इंग्लंड क्रिकेट बोर्डाच्या या निर्णयावर सुनील गावसकर यांनी नाराजी व्यक्त करत स्पोर्ट्स स्टारवर आपल्या भावना व्यक्त केल्या आहेत. “इंग्लंड आणि हिंदुस्थान यांच्यात खेळल्या जाणाऱ्या कसोटी मालिकेच्या विजेत्यांना देण्यात येणाऱ्या पतौडी ट्रॉफीला हटवण्याचा निर्णय ECB ने घेतला आहे, ही खरोखरच त्रासदायक बातमी आहे. व्यक्तिगत खेळाडूंच्या नावाने खेळली जाणारी ट्रॉफी हटवण्याचा निर्णय घेतला असून हे पहिल्यांदाच होत आहे. हा पूर्णपणे ECB चा निर्णय आहे आणि BCCI ला बहुतेक याची माहिती देण्यात आली असेल. यावरून हिंदुस्थान आणि इंग्लंडमधील क्रिकेटमध्ये पतौडी कुटुंबाच्या योगदानाबद्दल असंवेदनशीलता दिसून येते.”, असे सुनील गावसकर म्हणाले आहेत.
