ओसाका (जपान) येथे पार पडलेल्या आंतरराष्ट्रीय लॉन टेनिस स्पर्धेमध्ये हिंदुस्थानचा (महाराष्ट्र -मुंबई) युवा टेनिसपटू विश्वजीत सांगळे यांनी विजेतेपद पटकावत देशाचे नाव उज्ज्वल केले आहे. कोविड काळानंतरचे विश्वजीतचे हे पहिले विजेतेपद आहे. आजचा विजय विश्वजीतला येणाऱया ऑलिम्पिकसाठी व एटीपी स्पर्धांच्या वाटचालीत कायम प्रेरणा देत राहील. खेळांसाठीचे अथक परिश्रम, आर्थिक मदतीसाठीची धडपड या सगळय़ाचे आज चीज झाले. शारीरिक व मानसिक सुदृढता यांचे संतुलन साधत खेळाचा सराव उत्तम केल्यामुळे विजेतेपद पटकावता येते हे तितकेच खरे, अशी आनंदी प्रतिक्रिया विश्वजीतच्या आईने व्यक्त केली आहे.
