शिरूर पोलीस स्टेशन हद्दीत घरातून निघून गेलेल्या १३ अल्पवयीन बालिकांचा शोध घेऊन त्यांना पालकांच्या ताब्यात देण्यात आले. हरवलेल्या ४५ महिला व ३५ पुरुष यांचा शोध घेण्यात शिरूर पोलीस स्टेशनच्या पोलीस पथकाला यश आले असल्याची माहिती पोलीस निरीक्षक संदेश केंजळे यांनी दिली आहे.
शिरूर शहर, तसेच पोलीस स्टेशन हद्दीतून जानेवारी ते मे २०२५ या कालावधीत शिरूर पोलीस स्टेशनमध्ये अल्पवयीन बालिका घरातून निघून गेल्याबाबत १३ तक्रारी दाखल होत्या. या गुन्ह्यांचे गांभीर्य व संवेदनशीलता लक्षात घेऊन पोलीस निरीक्षक संदेश केंजळे यांनी गुन्हे शोध पथकाचे पोलीस उपनिरीक्षक शुभम चव्हाण व पथकाला अल्पवयीन बालिकांचा तत्काळ शोध घेण्याबाबत आदेश दिले होते. गुन्हे शोध पथकाचे अधिकारी व अंमलदार यांनी तांत्रिक विश्लेषण, बातमीदार यांच्याकडून माहिती काढून कसोशीने तपास केला. आतापर्यंत शिरूर पोलीस स्टेशन हद्दीमधील १३ अल्पवयीन बालिकांचा शोध घेऊन त्यांना सुखरूप त्यांच्या नातेवाईकांच्या ताब्यात देण्यात यश आले आहे.
शिरूर शहर, तसेच पोलीस स्टेशन हद्दीतून ४५ महिला व ३५ पुरुष हरवले असल्याबाबत तक्रारी दाखल होत्या. या प्रकरणातील संवेदनशीलता लक्षात घेऊन त्यांचा शोध घेण्याबाबत पोलीस निरीक्षक संदेश केंजळे यांनी पोलीस हवालदार संपत खबाले, पोलीस अंमलदार सोनाजी तावरे, आकाश नेमाणे, पवन तायडे, महिला पोलीस अंमलदार सारिका माळी यांची ‘मिसिंग’ शोध पथकामध्ये नेमणूक केली. हरवलेल्या ४५ महिला व ३५ पुरुषांचा शोध घेऊन त्यांना त्यांच्या नातेवाईकांच्या ताब्यात देण्यात आले आहे.
ही कामगिरी पोलीस अधीक्षक संदीपसिंग गिल, अपर पोलीस अधीक्षक रमेश चोपडे, उपविभागीय पोलीस अधिकारी प्रशांत ढोले, पोलीस निरीक्षक संदेश केंजळे यांच्या मार्गदर्शनाखाली शिरूर पोलीस ठाणे गुन्हे शोध पथकाचे पोलीस उपनिरीक्षक शुभम चव्हाण, हवालदार नाथसाहेब जगताप, अंमलदार विजय शिंदे, नीतेश थोरात, नीरज पिसाळ, सचिन भोई, निखिल रावडे, अजय पाटील, रवींद्र आव्हाड, महिला पोलीस हवालदार भाग्यश्री जाधव, पोलीस अंमलदार मोनिका वाघमारे, प्रतिभा देशमुख, स्नेहल होळकर, गोदावरी धंदरे, परवीन पप्पूवाले, गीता सुळे व ‘मिसिंग’ पथकाचे पोलीस हवालदार संपत खबाले, अंमलदार सोनाजी तावरे, आकाश नेमाणे, पवन तायडे, महिला पोलीस अंमलदार सारिका माळी यांच्या पोलीस पथकाने केली आहे.
